Úsh tilde shyǵarylǵan kitap-fotoalbomda Túrkistan oblysynyń tarıhı oryndary túgel qamtylǵan. Kıeli oryndar men eskertkishter týraly maǵlumattar qazaq, aǵylshyn jáne orys tilderinde berilip, sýrettermen kómkerilgen. Al «Ońtústiktiń qasıetti oryndary: ańyz-ápsanalar» atty kitapta aımaqtaǵy áýlıe-ámbıeler, el aýzyndaǵy tulǵalar týraly ańyzdar men áńgimeler jazylǵan. Kóne zamandardan syr shertetin ápsanalar men qyzyqty derekter mol.
Oblystyq ishki saıasat basqarmasy uıymdastyrǵan tusaýkeser rásiminde oblys ákimi Janseıit Túımebaev «Rýhanı jańǵyrý» baǵdarlamasy aıasynda jaryq kórgen týyndylardyń mańyzdylyǵyna toqtalyp, oqyrman úshin qajet dúnıeler kóp ekenin atap ótti. «Biz óz tarıhymyz ben týǵan ólkemizdiń san ǵasyrdan beri kele jatqan shejiresin bilý arqyly ulttyq bolmysymyzdy, ulttyq kodymyzdy saqtaı alamyz. Bul kitaptar rýhanı jańǵyrý úshin óte mańyzdy. Qysqasy, mundaı kitaptar oqyrmanǵa jetip, rýhanı qazynadan árbir azamat sýsyndaýy tıis», dedi Janseıit Qanseıituly. Sondaı-aq «2017 jyl: aıshyqty oqıǵalar» atty kitap ta oqyrmanǵa jol tartty. Bul kitap oqyrmandardy ótken jylǵy aıryqsha oqıǵalardan habardar etedi.
Ǵalymjan ELShIBAI,
«Egemen Qazaqstan»
Túrkistan oblysy
