Sábıt Muqanov atyndaǵy oblystyq ǵylymı-ámbebap kitaphanada marqumnyń 75 jyldyǵyna oraılastyrylyp ótken eske alý keshine jınalǵandar ult qaıratkeriniń maǵynaly ǵumyry, shyǵarmashylyq murasy, ór minezi týraly áserli áńgime órbitti. Zııaly qaýym ókilderi, birge qyzmet atqarǵan áriptesteri, ustazdar men jastar aldymen “Ultyn súıgen qaıratker” degen ataýmen uıymdastyrylǵan kitap kórmesin tamashalap, Mákeńniń týyndylarymen, shyǵarmashylyq laboratorııasymen tanysty.
“Qyzyljar-Aqparat” jaýapkershiligi shekteýli seriktestiginiń dırektory Jarasbaı Súleımenov qalamgerdiń birqatar qasıetterine toqtalyp ótti.
«Qaısarlyǵy, batyrlyǵy erekshe tánti etetin.Qazirgi jas urpaq Mákeńderdiń úlgisinde tárbıelense, eline degen súıispenshiligi joǵary, Otan úshin keýdesin oqqa tóseı alatyn jastardyń qatary kóbeıeri sózsiz» , dedi Jarasbaı Qabdollauly.
Oblystyń qurmetti azamaty Bolat Saǵyndyqov Málik Muqanovtyń ákesi Jaqyptyń ótken ǵasyrdaǵy saıası qýǵyn-súrgin jyldarynda áke-sheshesine qol ushyn bergen qamqorlyǵyn, erligin aıtyp, qalamgerdiń ulttyq múdde, eldik maqsat jolynda atqarǵan qyrýar jumystaryna toqtaldy.
Oblystyq “Lenın týy”, respýblıkalyq «Halyq keńesi»,“Egemen Qazaqstan” gazetterinde qyzmet istegen jyldary kóptegen túıindi máselelerge qalam tartyp, árkez halyq qamyn birinshi orynǵa qoıyp júrdi. Ardager jýrnalıst Nursaıyn Shárip Málik Muqanovty kópshilik til janashyry retinde de tanıtynyn, oblys ortalyǵyndaǵy №6 mektepke Qojabergen jyraý esiminiń berilýine de kóp eńbek sińirgenin aıtsa, jeke kásipker Baldyrǵan Ilııasov nysandarǵa esimin berý máselesin kóterdi.
Aǵamyzdyń oshaǵyn óshirmeı, urpaqtaryn qanattyǵa qaqtyrmaı ónegesimen uıytyp otyrǵan jary Ádııa Ahmetova jınalǵan jurtshylyqqa alǵysyn jetkizdi.
О́mir ESQALI,
«Egemen Qazaqstan».
Soltústik Qazaqstan oblysy
