Osy oraıda Mádenıet jáne sport mınıstrligi Elbasynyń «Bolashaqqa baǵdar: rýhanı jańǵyrý» maqalasynda aıtylǵan baǵdarlamalyq jospardy júzege asyryp, joǵarydaǵy Uly dalanyń qundy muralaryn álemge tanystyrý maqsatynda ótken jyldyń jeltoqsan aıynan bastap «Altyn adamnyń álem mýzeılerine sherýi» atty shara uıymdastyrǵan bolatyn.
Sherý-joba aıasynda myńǵa jýyq qundy jádigerimiz Mınsk qalasyndaǵy Belarýs Ulttyq kórkemóner mýzeıi, Máskeý qalasyndaǵy Búkilreseılik qoldanbaly-sándik jáne halyqtyq óner mýzeıi, Bakýdegi Ázerbaıjan tarıhy Ulttyq mýzeıi, Qytaı elindegi Shensı provınsııasynyń tarıh mýzeıi, Gdansk qalasyndaǵy polıak tarıhı mýzeıi, Koreıa ulttyq mýzeıi qatarly mekemelerdi aralap shyqqan eken.
Keshe álemdi sharlap shyqqan altyn adamdar men qundy buıymdar kórme jobasyn qorytyndylaý maqsatynda Mádenıet jáne sport mınıstrligi men Ulttyq mýzeı ákimshiligi baspasóz máslıhatyn ótkizdi. Keleli kezdesýdiń mańyzy jaıly aıtyp, sóz sóılegen mınıstr Arystanbek Muhamedıulynyń aıtýynsha, Uly dalanyń ejelgi jáne dástúrli óner týyndylaryn álemniń aldyńǵy qatarly mýzeılerinde kórsetý arqyly biz elimizdiń tamyry tereń tarıhyn, baı mádenıeti men teńdessiz qolónerin pash etý, nasıhattaý isin sátti aıaqtappyz. Iаǵnı, kórmeni 200 myńnan astam adam kelip tamashalapty.
Joǵarydaǵy álemniń alty elin aralap shyqqan jádigerlerge kelsek, bulardyń deni erte temir dáýirinde ómir súrgen alǵashqy dalalyq memleketter murasy sanalatyn ań stılindegi buıymdar eken, sonymen qatar qazaqtyń dástúrli mádenı jaýharlary sanalatyn sándik qoldanbaly óner týyndylary da bar. Halyqaralyq kórmeniń ótýine atsalysýshylardyń biri Ulttyq mýzeı janynan qurylǵan «Halyq qazynasy» ǵylymı-zertteý ınstıtýtynyń jetekshisi Aqan Ońǵarulynyń paıymynsha, Uly dala mádenıetiniń árbir jádigerine tereń maǵynaly dalalyq pálsapa sińirilgen, sol sebepti ǵasyrdan-ǵasyrǵa jalǵasqan urpaq sabaqtastyǵyn shetelderge tanytýymyz úlken istiń bastaýy kórinedi.
Basqosýdyń sońy qazaqstandyq jáne sheteldik mýzeı mamandarynyń pikir almasýyna ulasyp, óz kezeginde Ázerbaıjan tarıhy Ulttyq mýzeıi dırektorynyń orynbasary Mahfýza Zeınalova, Búkilreseılik qoldanbaly-sándik jáne halyqtyq óner mýzeıiniń keńesshisi Galına Andreeva, Belarýs Ulttyq kórkemóner mýzeıi dırektorynyń orynbasary Sergeı Vecher, Qytaı elinen kelgen mýzeı mamany Van Chjınsýn, Koreıa Ulttyq mýzeıiniń Azııa óneri departamentiniń dırektory Choı Seon Djý, elimizdiń tanymal arheologi Zeınolla Samashevtar óz oılaryn ortaǵa saldy.
Beken QAIRATULY,
«Egemen Qazaqstan»
