Til bilimi ınstıtýtynyń dırektory, fılologııa ǵylymdarynyń doktory, professor, UǴA korrespondent-múshesi Erden Qajybek kirispe sózinde akademık Qaıdardyń til bilimin damytýǵa sińirgen orasan eńbegin atap ótti. Budan keıin sóz alǵan akademık О́mirzaq Aıtbaıuly ǵalymnyń birneshe ǵylymı erlikterin baıandap berdi. Til biliminde jańa salalardyń negizin salǵandyǵyn, shákirtterge jasaǵan qamqorlyqtaryn aıtty. Akademık Ábdýalı Qaıdar ǵylymı qyzmetinde 14 ǵylym doktoryn, 75 ǵylym kandıdatyn tárbıelep shyǵarǵan eken. Akademık Ábdýalı Qaıdar Qazaqstannyń latyn álipbıine kóshý máselesin eń alǵash bolyp kótergen ǵalym.
«Jer júzi órkenıetti elderdiń barlyǵy ózderiniń jazý mádenıetin kompıýter tehnıkasy arqyly damytyp otyrǵan búgingi tańda mundaı bolashaǵy zor múmkinshilikti bizdiń de tolyq paıdalanýymyz kerek. Al bul tehnıkanyń tetigi latyn jazýynda ekeni aıdaı anyq. Sondyqtan da latyndy qabyldaý degen sóz – bolashaqpen sanasý» dep jazdy akademık óziniń maqalalarynyń birinde. Sol tusta kórnekti tilshi ǵalym, akademık Rabıǵa Syzdyqova: «Akademık Á.Qaıdarovtyń ana tiline istegen qyzmetiniń ekinshi túri – 1990-jyldardan bastap qaýyrt jandanǵan til saıasatyna qatysty qoǵamdyq is-áreketteri. Buǵan ǵalymnyń azamattyq ar-ujdany men ulttyq namysy apardy. Á.Qaıdarov prınsıptilik pen tabandylyq kórsetti» dep jazdy.
Tusaýkeser rásiminde ǵalymnyń professor A.Jubanov, professor J.Mánkeeva, professor R.Shoıbekov sııaqty áriptesteri, Abaı atyndaǵy Qazaq ulttyq pedagogıkalyq ýnıversıtetiniń professory F.Orazbaeva, ál-Farabı atyndaǵy Qazaq ulttyq ýnıversıtetiniń professory G.Smaǵulova sııaqty shákirtteri akademık týraly izgi nıetterin arnady.
Talǵat SÚIINBAI,
«Egemen Qazaqstan»
ALMATY
