Respýblıka óńirlerinen jınalǵan qalamger qaýymy Prezıdenttiń «Uly dalanyń jeti qyry» maqalasyn talqylap, ulttyq ádebıetimizdiń aldynda turǵan keleli mindetterdi ortaǵa saldy.
Qazaqstan Jazýshylar odaǵynyń Basqarma tóraǵasy Ulyqbek Esdáýlet Prezıdent maqalasynyń mán-mańyzy, qundylyǵy turǵysynda dáıekti dereknamalarǵa negizdelgen baıandamasyn oqydy. «Biz otarshyldyqtyń qıyn-qystaýynan ótkennen keıin, ózimizdiń tarıhymyzǵa ózimiz qolymyz jetpeı zárý bolyp kelgen elmiz. Qadyr Myrzalıev aǵamyzdyń «Bizdiń tarıh bul-daǵy qalyń tarıh, oqýlyǵy jup-juqa biraq-taǵy» deıtin sózinde úlken shyndyq baryn qaıtalap aıtýdan jalyqpaımyz. Sebebi, bizge óz tarıhymyzdy oqytpaı, ózimizden jasyryp, basqa ulttardyń, ózge memleketterdiń tarıhyn óz tarıhymyzdan góri jetik bilip kelgenimiz jasyryn emes» deı kelip, maqalada qozǵalǵan máselelerdi oryndaýda jazýshylarǵa artylatyn júktiń salmaǵy jeńil emes dep atap ótti. Osy baǵytta bárin zerdeleý, júzege asyrý jaǵy oılastyrylýy kerek. Máselen, aldaǵy ýaqytta «Uly dala tulǵalary» serıasyndaǵy kitaptar jazylady. Osy kezge deıin tarıhı taqyryptarǵa Ábdijámil Nurpeıisov, Qabdesh Jumadilov, Muhtar Maǵaýın, Ánes Saraı, Qoıshyǵara Salǵarın, Qajyǵalı Muqametqalıev, Beksultan Nurjeke, Kádirbek Segizbaı, Smaǵul Elýbaı, Tursynhan Zákenuly, t.b. qalamgerlerimiz qalam terbep kelse, áli de qalamy qolynan túspegen jazýshylarmen qatar ádebıetimizdiń keıingi býyn ókilderine de keń tynys ashylýda.
Odaq tarapynan qazirgi kezde Bilim jáne ǵylym mınıstrliginiń qarjylandyrýymen M. Áýezov atyndaǵy Ádebıet jáne óner ınstıtýty jáne Kompozıtorlar odaǵymen birlesip «Dala folklorynyń antologııasy» men «Uly dalanyń kóne saryndary» jınaǵyn qurastyrý jumystary qolǵa alynǵan. «Ádebı ólketaný» jobasy jalǵasyn taýyp, folklorǵa, ulttyq salt-sanaǵa baılanysty ańyz-ertegilerdi jınastyratyn ekspedısııalar josparlanǵan. Qazirdiń ózinde óńirlerge baryp qaıtqan jazýshylar ónimdi eńbek etýde.
Qoǵamda úlken serpilis týǵyzǵan maqalaǵa oraı jazýshylarǵa kól-kósir tarıhı taqyryptar usynylyp otyr. Qalamdastaryna qapy qalmaı, qareket etýdi usynǵan Odaq basshysy osy máselede sergektik tanytyp, óz oı-pikirlerin, joba-josparlaryn baspasóz betterinde, áleýmettik jelilerde jarııalap otyrý jaıynda usynys bildirdi.
Bıylǵy jyldyń 9 aıynda Qazaqstannyń túkpir-túkpirinde 70-ke jýyq saltanatty jıyndar, mereıtoılar, eske alý, shyǵarmashylyq jáne avtorlyq keshter, oqyrmandarmen kezdesýler ótkizilgen. Sonymen qatar halyqaralyq deńgeıde Astananyń 20 jyldyq mereıtoıyna oraı ótken «Aq ordaly Astanam» halyqaralyq poezııa keshi men «Qazirgi zamanǵy sóz energııasy» Eýrazııalyq ádebı forýmy sııaqty eki iri is-shara ótkizilgeni belgili. Jazýshylarǵa arnalǵan ádebı alań erkin shyǵarmashylyqta pikir almasýǵa, tájirıbe bólisýge jasalǵan mol múmkindik boldy. Munyń barlyǵy qazaq jazýshylarynyń eńbekterin nasıhattap, dáripteýge baǵyttalyp otyr. Endigi kezekte Jazýshylar odaǵy zamanaýı kezeńniń jańashyl talaptaryn ıgerip, qazaq ádebıetin álemdik deńgeıge kóterip, jas qalamgerlerdi qoldaý baǵytynda tyń bastamalardy qolǵa alatyn bolady. Osy baǵyttaǵy naqty josparlarmen tanystyrǵan Odaq basshysy aldaǵy jyly Jazýshylar odaǵynyń ári «Qazaq ádebıeti» gazetiniń 85 jyldyǵy toılanatyndyǵy qalamger qaýymǵa taǵy bir tyń serpin beretin mańyzdy sharalardyń biri bolatyndyǵyna senim bildirdi.
Pleným aıasynda tóraǵanyń birinshi orynbasary Aqberen Elgezek Odaq Jarǵysyna engizilgen tolyqtyrýlar men ózgerister týraly, sondaı-aq aldaǵy jumys tártibiniń raıynan habardar etti. Jazýshylar jıyn sońynda Prezıdent maqalasyna oraı arnaıy Úndeý qabyldap, onda elimizdiń barlyq aımaqtaryn qamtıtyn «Tarıhı-ádebı ólketaný» jobasyn usyndy. Atalǵan joba shejireli tarıhymyzdy qaıta saraptap, keler urpaqqa mura bolar tarıhı taqyryptarǵa arnalǵan jańa shyǵarmalardyń jazylýyna yqpal etedi.
Odaq keleshegine ári iskerlik josparlarǵa úlken úmit artqan qalamgerler erkin oı alańynda óz pikirlerin bildirip, ulttyq ádebıettiń jarqyn bolashaǵyna sáttilik tileýmen tarqasty.
Elvıra Serikqyzy,
«Egemen Qazaqstan»
ALMATY
