«Elimizdiń shalǵaıynda jatsam da, kóshten ozbaı, sońynda qalmaı, qolyna qalam ustaǵan qalamgerlerdiń bel ortasynda júrgenime táýba deımin. Kúnniń aıazyna qaramaı osynda jınalǵan jyr súıer qaýymǵa da rızashylyǵymdy bildiremin. Men ár bes jyl saıyn mereı toıyma oraı oqyrmanym aldynda shyǵarmashylyq keshim arqyly esep berip otyratyn edim. Onda árıne mereıtoı bolǵan soń, ýaqyttyń barlyǵy meniń atyma aıtylǵan madaq sóz ben shapan jabý sekildi syı-sııapatqa ketip qalatyn, keshtiń sońynda ǵana ózim birdi-ekili óleń oqyp qalatyn edim. Búgingi keshte kerisinshe, ózim óleń oqyǵym keldi» dep aǵynan jaryldy Aqylbek Qojauly.
Keshte aqyn: «Jalǵanǵa jalpaq jaryǵyn taratqan, Alla!
Tilime tátti baldy da jalatqan, Alla!
Qulyńa myna kóz salshy, jaratqan Alla!
Aýzyma jaqsy sóz salshy, jaratqan Alla!» dep bastap, kósilip óleńderin oqydy.
Oblystyq mádenıet basqarmasynyń basshysy Erlan Qalmaqov kesh ıesin oblys ákimi atynan quttyqtap, Aqylbek Shaıahmettiń qazaq ádebıetinen óz ornyn alǵan qalamger ekenin jáne onyń óńirdiń mádenı ómirine qosqan úlesin de erekshe atap ótti. Almatydan arnaıy kelgen «Halyq Qaharmany Saǵadat Nurmaǵambetov» atyndaǵy qordyń ókili, «Qazaq» gazetiniń bólim meńgerýshisi Qalı Qambarov Qazaqstan Jazýshylar Odaǵynyń tóraǵasy Ulyqbek Esdáýlettiń quttyqtaý hatyn tabystady. Sonymen qatar memleket jáne qoǵam qaıratkerleri Kenjebek Ýkın, Ysqaq Esirgepov, aqyn, qajy Jolbarys Baıazıd jáne taǵy basqalar aqynǵa izgi tilekterin bildirdi, syı-sııapat ta jasady. Kesh Aqylbek Shaıahmet sózine jazylǵan ándermen kómkerildi.
Názıra Járimbet,
«Egemen Qazaqstan»
Qostanaı
