Máselen, Aqsaı tehnıkalyq kolledji kontıngentti negizsiz 116 tulǵaǵa kóbeıtip, bıýdjetten zańsyz 3 mln teńge alǵan. Qarajatty alý úshin oqýdan shyǵarylǵan jáne oqýyn aıaqtaǵan tulǵalar jalpy tizimge ádeıi engizilgen.
Bókeıorda, Jalpaqtal, Qaratóbe, Terekti, Syrym jáne Shyńǵyrlaý aýdandarynyń kolledjderinde sabaqqa qatyspaı, ár jerde jumys jasaǵan stýdentterge shákirtaqy tóleý faktileri anyqtalypty.
Mysaly, S. esimdi stýdent 2016-2017 jyldary Terekti kolledjinde oqı tura, «Shyńǵyrlaý aýdanynyń veterınarııalyq stansııasy» MKK-da turaqty jumys jasaǵan. Jáne aı saıyn shákirtaqysyn alyp turǵan.
Tekserilgen kolledjderdiń bárinde oqýyn aıaqtaǵan kolledj túlekteriniń jumyspen qamtylýy jónindegi málimet shyndyqqa saı emes, ıaǵnı asyra kórsetilgen.
«Atap aıtsaq, Jalpaqtal aýdanynyń kolledjinde 2017 jyly jumysqa ornalasý kórsetkishi qaǵaz júzinde 92%-dy quraǵan. Tekseris kórsetkishtiń is júzinde 48% ekendigin kórsetti, óıtkeni 41 stýdent jumysqa ornalasý týraly ótirik málimet tapsyrǵan» - deıdi prokýratýra.
Oral qalasynyń gaz, munaı jáne salalyq tehnologııalar kolledjiniń keıbir stýdentterine oqý jýrnalyna belgi qoıylǵanmen, olar sol kúnderi shetelde bolǵany anyqtaldy.
Tasqala aýdanynyń kolledjinde basqa jerden kelip oqıtyn stýdentterge jazǵy jáne qysqy merzimde jeńildikpen jol júrýine bólingen 75 myń. teńge berilmeı, shákirtterdiń quqyǵy buzylǵan.
Zań buzýshylyqtyń bir parasy jataqhana máselesine oraı anyqtalǵan. Máselen, tekserilgen alty kolledjde basqa qaladan kelip oqıtyn stýdentterge arnalǵan jataqhana joqtyǵy anyqtaldy. Olar – Oral aqparattyq-tehnologııalyq, Oral polıtehnıkalyq, Batys Qazaqstan ındýstrıaldyq, Aqsaı tehnıkalyq, Ekonomıka jáne aqparattyq tehnologııalar, Batys Qazaqstan ınjenerlik-tehnologııalyq kolledjderi. Al memlekettik tapsyrysty alý úshin jataqhananyń bolýy – mindetti shart.
Batys Qazaqstan oblysyndaǵy joǵary jáne arnaýly oqý oryndarynda jataqhana jetispeýshiligi buryn da aıtylyp keledi. О́ńir basshysy Altaı Kólginov ótken jyldyń sońynda oblystyq máslıhat depýtattary aldynda Elbasynyń bes áleýmettik bastama baǵdarlamasy boıynsha 1800 stýdentke arnalǵan 5 jataqhana salý boıynsha daıyndyq jumystary bastalǵanyn habarlaǵan bolatyn.
Prokýrorlyq tekseris nátıjesinde bıýdjetke barlyǵy 8 mln. teńgeden astam qarajat qaıtaryldy jáne jaýapkershilikke 72 laýazymdy tulǵa tartyldy.
Qazbek QUTTYMURATULY,
«Egemen Qazaqstan»
Batys Qazaqstan
