Áleken aǵamyz tirshiliginde aýyldas aqyn aǵasy Erkin Ibitanovpen ázil-qaljyńy jarasyp júretin kórinedi. Aqynnyń úıi de inisi jumys isteıtin aýrýhana mańynda bolsa kerek. Bir kúni jumys kabınetinde otyryp terezesinen esik aldynda ary-beri oıǵa shomyp júrgen aqyn aǵasyn kóredi. Áınektiń arjaǵynan baqylap tursa, Eraǵań kóshe boıymen yrǵatylyp kele jatqan áldekimdi toqtatyp, áldenelerdi aıtyp álgi adamdy ózimen birge úıine ertip kiripti. Aǵasynyń kúıi kelmeı turǵanyn birden ańǵarǵan inisi shabytyn ashaıyn degen oımen aýrýhanadaǵy taza spırtten qutyǵa quıyp alyp aqynnyń úıine bettepti. Esik sart ashylǵanda ańtarylyp qalǵan Eraǵań, sýyt kelgen inisin synaǵandaı keıip tanytyp: «Myna bizdiń Áleken, Qyzyl kózdi bále eken» dep qashanǵy qaljyńbas qalpymen inisin túırep alypty. Aqynnyń shymshymasyna muqalmaǵan Álekeń, jol qýyp kelse ákesindeı bolatyn Erkin aǵasyna qarap turyp «О́z qulynyn ózi shaınaıtyn, Jaman aıǵyr bar eken» dep, esikti sart jaýyp shyǵyp ketipti. Sózdiń parqyn biletin er kóńildi Eraǵań inisiniń taýyp aıtqan teńeýine tánti bolyp, sózden jyǵylǵanyn bildirip, qýyp jetip «Áı, zántalaǵym-aı» dep arqasynan qaǵyp, úıine ertip kiripti desedi.
Sol Álmuhammed aǵamyz bir kúni qaıynjurtynda úlken toı bolatyn bolyp Almatyǵa kelipti. Úlkender jaǵy toıǵa kelgen ónerpazdardyń syıaqysyn berip esep aıyrysý isin kúıeýbala retinde aǵamyzǵa tapsyrsa kerek. Buryn-sońdy mundaıdy kórmegen taýyndaı taza aǵamyz, kúnde kókjáshikten ónerin tamashalap júrgen tanymal ánshiniń fonagrammamen án aıtqanyna qatty qapalanyp, bas shaıqapty. Saf ónerdiń maıdalanyp bara jatqanyna nazalanǵan ol esep aıyrysar sát kelgende gonorarǵa beriletin aqshany kóshirmeden ótkizip alyp, álgi ánshige usynypty. Túk túsinbegen ánshimiz, mazaq qylyp tursyń ba degendeı, aǵamyzǵa bajyraıa qaraǵan kórinedi. Aǵamyz bolsa: «Jurtty qury aýzyńyzdy jybyrlatyp aldamaǵanyńyz jón. Kıeli ónerdiń kıesin ketirýge bolmaıdy. Shyn talant bolsańyz tabıǵı daýsyńyzben eki án oryndap berińiz» dep tótesinen qoıyp qalypty. «Halyq qalasa han túıesin soıady» degendeı, lajy quryǵan ónerpazymyz namysqa tyrysyp, bir emes, birneshe ándi tiri daýysta tamyljyta shyrqap, toı qonaqtarynyń iltıpatyna bólenip ketken eken.
О́tken joly bir apamyzdyń «qazir daýsy bardyń emes, aýzy bardyń bári ánshi ǵoı» degen sózi, áldeqashan umytylǵan bul qyzyq jaǵdaıdy eriksiz eske túsirdi. Osy áńgime oıymyzda qalǵan biz, shirkin, qazirgi konsertter men toı-dýmandarda qur aýyzdy jybyrlatyp qoıyp, fonogrammamen án aıtýdan shimirkpeıtin keıbir ánshilerge jurt sol Álekeń aǵamyz sııaqty bıik talǵammen qaraı alsa, kıeli sahna talantsyzdardan tazalanyp, estradamyz es jııar ma edi degen oıǵa qalamyz.
Arman OKTIаBR,
«Egemen Qazaqstan»
ALMATY
