Osyǵan oraı, ótken jyldyń mamyr aıynda IT-qyzmet salasyndaǵy kóshbasshy «Tengri Lab» kompanııasy «Aqmola elektr jelilerin úlestirý kompanııasy» AQ, «Qazaqtelekom» AQ, ERG, BTS Digital jáne Aqmola oblysy ákimdigimen birlesip, «Aqyldy qala» jobasyn qolǵa aldy. «Tengri Lab» kompanııasynyń bas dırektory Álimjan Esetovtiń aıtýynsha, osy alty aıdyń ishinde biraz jumystar atqarylypty. Aqkól qalasy Astanaǵa jaqyn (100 shaqyrym qashyqtyqta) ornalasqandyqtan, jobany osynda júzege asyrý qolǵa alynǵan. Sondaı-aq, qala turǵyndarynyń sany men ınfraqurylymynyń ornalasýy da óte qolaıly. Jalpy, joba qolǵa alynǵan alty aıdyń ishinde qala 4G jáne LoraWan jelisine qosyldy, 4500 sý eseptegish, 6000 elektr qýatyn eseptegish, kóshelerdegi 250 jaryq shamdary aýystyryldy. Budan bólek, 100 shaqyrym elektr kabelderi almastyrylyp, 70 ıntellektýaldy beınebaqylaý kameralary, qoljetimdilikti baqylaý júıesi, mektep jáne ákimdikterde jeke tulǵany sáıkestendirý, ekologııalyq baqylaý júıesi, tútindi anyqtaıtyn aqyldy datchıkter, qoǵamdyq kólikter men memlekettik kólikterdi GPSmonıtorıng júrgizetin júıeler ornatyldy. Qalanyń 3D kartasy ázirlengen. Keleshekte bul júıeler osyǵan deıin qoljetimsiz bolǵan ózge de málimetterdi anyqtap, engizetin bolady.
Baıqal BAIÁDIL,
«Egemen Qazaqstan»
Aqmola oblysy,
Aqkól qalasy.
