Fotony túsirgen Erlan OMAR, «Egemen Qazaqstan»
Buǵan deıin aıań túrleri, jelis túrleri týraly jarııalaǵan edik. Bul joly shabys túrleri jóninde áńgimeleımiz.
Shabys túrleri. Shabys – jylqy malynyń eń shapshań qozǵalysy, ıaǵnı, jylqynyń jelisten de tez júrisin aıtady. Jylqy shabyspen uzaq joldy tez alady, biraq tym uzaqqa shydamaıdy. Shapqan kezde attyń aıaq tastaýy alysqa ketip, qozǵalystyń qýaty artyp, kúshi qosylady. Shabystyń jyldamdyǵy artqan saıyn aıaq tastaýy jıileıdi.
● Jaı shabys – Qysylmaı erkimen shabady. Baptaǵan júırik jylqylardy jabattap ter alǵanda jaı shabyspen júrgizedi. Jaı shabyspen júrgen jylqy aıaǵyn erkin tastaıdy.
● Tekirek – Qosaıaq shabys dep te aıtady. Jylqy aldyńǵy jáne artqy eki aıaǵyn parlap teń tastaıdy. Tekirek shabysqa úırengen jylqy shaldyqpaı ónimdi júrip, barar jerge jyldam jetkizedi.
● Shapqyn – Ortasha shabys túri. Jylqy aıaǵyn shadyrlaı tastap qozǵalady. Iаǵnı, oń jaq aldy jáne sol jaq artyn qaıshylap shabady. Júırik jylqylardy ter alyp, boı jazdyrý úshin shapqyn jasaıdy.
● Kósile shabys – Uzaq qashyqtyqqa shabatyn báıge attaryna tán qozǵalys. Aldyńǵy jáne artqy aıaqtaryn kósile tastaıdy da, qaıta baýyryna jınap shabady. Artqy aıaqtyń izi aldyńǵy aıaq izinen asyp túsedi.
● Aǵyndy shabys – Jylqynyń bar múmkindiginshe qatty shabýyn aıtady. Iаǵnı, qysqa qashyqtyqqa shabatyn báıge attaryna tán qozǵalys. Aǵyndap shapqan jylqy aıaǵyn qaıshylap tastap, qatty ekpinmen omyraýlap jel jarady.
Beken QAIRATULY,
«Egemen Qazaqstan»
