Aıtalyq, hımııa, daıyn metall óndirý isi men mashına jasaýda óndiris kólemi tómendegen. Petropavl aýyr mashına jasaý, «Munaımash», «Zıksto» zaýyttary tapsyrmalardy ıgere almaǵan. Aýdandar boıynsha Mamlıýt aýdany men Petropavl qalasy kósh sońynda qalǵan. Al Ǵ.Músirepov aýdanynda 2015 jyly bastaý alǵan Indýstrııalandyrý kartasynyń 2-shi besjyldyǵyna birde-bir joba engizilmegen. Esil, Shal aqyn, Ýálıhanov jáne Tımırıazev aýdandary bir ǵana joba usynǵan.
Indýstrıaldy-ınnovasııalyq damý baǵdarlamasynyń ekinshi 5 jyldyǵynda óńirde 94 mıllıard teńgeniń 44 jobasyn iske asyrý barysynda qosymsha 2,5 myń jumys ornyn qurý josparlanǵan. 4 jyl ishinde 28 joba júzege asyrylyp, 800-den astam adam jumysqa ornalastyrylǵan. Quıylǵan ınvestısııa kólemi 17 mıllıard teńgeden asady. Bıyl 14,7 mıllıard teńgeniń 7 jobasyn iske asyryp, 500 jańa jumys ornyn qurý belgilengen.
Alaıda, bul salada barlyq aýdan sheteldiń qaltaly azamattaryn tartýda belsendilik tanytyp otyrǵan joq. «Qazaq ınvest» UK ókilderi de osy pikirde. Memlekettiń qarjylyq qoldaýyna qaramastan, 13 aýdannyń 5-ýinde ınvestısııalyq jobalar qarastyrylmaǵan. Olar – Aqjar, Esil, Tımırıazev, Jambyl jáne M.Jumabaev aýdandary. Elimiz boıynsha bıznesti júrgizýdiń jeńildigi reıtınginde óńir 5-orynda tur. Jaǵdaı osylaı jalǵasa berse, osy úrdisten aıyrylyp qalýy ábden múmkin.
Memlekettik baǵdarlama aıasynda respýblıkalyq mańyzdaǵy 10 úzdik jobanyń qataryna Shalqar-Imantaý kýrorttyq aımaǵy da engen. Kýrorttyq aımaqty damytýǵa 32,4 mıllıard teńge qarjy bólinbek. Infraqurylym jańartylyp, jańa qonaq úıler men demalys bazalary boı kóteredi.
Alaıda oblys ortalyǵynan alys emes jerde ornalasqan Meńkeser kóli jóninde olaı aıtýǵa áli erte. Túrli aýrýǵa emdik qasıeti mol kól qaraýsyz qalǵan, ıe joq. Ony shıpaly orynǵa aınaldyrýǵa ınvestorlar izdestirilgenmen, tabylar emes. Al nıet etken jergilikti kásipkerlerdi jolatqylary kelmeıdi.
О́mir ESQALI,
«Egemen Qazaqstan»
Soltústik Qazaqstan oblysy
