О́tken jyly kentte bir jyldaı ýaqyt qyzmet etken burynǵy ákim Dáýlet Taıǵýlın óz erkimen jumystan ketken-di. Ákimge kóshelerdi jóndeý kezinde 6,6 mıllıon teńgeni tıimsiz paıdalanǵan degen aıyp taǵylǵan kórinedi. Al kenttiń kezekti jańa ákimin saılaý bıylǵy jyldyń 28 aqpanyna josparlanýda. Sondyqtan Á.Kúmpekeev endigi ákimdi tańdaý kezinde jergilikti turǵyndardyń pikirimen sanasýǵa ýádesin berdi.
- Eger de sizder jańa ákimdi qoldamasańyzdar, ol da bir-eki aptadan keıin ketýi qalýy da múmkin. Qoldap, birge jumys jasasańyzdar, - dedi qala ákimi.
Turǵyndardyń kóńilderinen shyqpady ma, kenttiń taǵy bir burynǵy ákimi Jeńis Ábiken kórshi Qyzyljar aýylyna aýysqan-dy. Turǵyndar M.Mámetova kóshesindegi asfalt jamylǵysyna tıisti standarttarǵa saı jóndeý júrgizbegen merdigerdiń isin aıaqtaýǵa májbúr etken-di. Burynǵy ákim D.Taıǵýlınnniń de qyzmetinen ketýine de osy másele sebep bolǵandaı.
Kósheni retke keltirýge bıýdjetten 10 mıllıon teńge bólingen. Al, jalpy kenttegi kóshelerdiń uzyndyǵy 66 shaqyrymdy qurasa, qazir 44 kóshe, ıaǵnı, áli 47 shaqyrymy asfalt tóseýdi qajet etýde. Kent ákiminiń mindetin atqarýshy Álııa Ybyraeva turǵyndar aldynda esep berdi.
Esep berý kezeńi boıynsha aýyl bıýdjeti shamamen 308 mıllıon teńgeni qurady. О́ńirlerdi 2020 jylǵa deıin damytý baǵdarlamasy aıasynda aýylda 52 kóshege aýlaishilik sý qubyry júrgizilip, 1880 turǵyn úıge sý jelileri tartylypty. Aýyl ishindegi 3 kósheniń joldary jóndeldi, turǵyndardyń qaýipsizdigi úshin 29 beınebaqylaý kamerasy ornatylǵan.
Sondaı-aq, balalardy tegin tasymaldaýdy uıymdastyrý úshin arnaıy mektep avtobýsy satyp alyndy. Kenttiń shetindegi qańyrap, ıesiz qalǵan kópqabatty turǵyn úılerdi buzý josparlanýda. Pavlodar - Astana tas joly boıynda ornalasqan súreńsiz úıler kórinisi endi kelmeske ketpek.
Buzylǵan úılerdiń turǵyndary basqa baspanaǵa kóshiriledi. Tipti, qala ákimi olardy tezdetip buzyp, ornyna jeke turǵyn-úı qurylysyn qolǵa alý kerek deıdi.
Ákimdiktiń esebinen soń, qala ákimi Á.Kúmpekeev turǵyndardyń aryz-shaǵymdaryn tyńdady. Turǵyndar 10 myńdaı halqy bar kentte polısııa bólimshesiniń ashylýyn surady.
Kópshilik jóndelgen kóshelerdiń sapasyna qatysty renishterin bildirdi. Qala ákimi kóshelerdi bıyl «jaqsylap» jóndeýge endi 75 mıllıon teńge bólinetinin aıtty.
Kent ishindegi tazalyqty saqtaý – aýyldyqtardyń mindeti. Sondyqtan turǵyndardy aýyldy lastaıtyn óz adamdaryn tártipke shaqyrý kerektigin túsindirdi.
Farıda BYQAI,
«Egemen Qazaqstan»
PAVLODAR
Sýretti túsirgen: Álibek Jıenálıev
