Alǵashqy shaıbany 14-mınýtta Pavel Dedýnov soqty. Osy esep uzaq ýaqyt boıy saqtaldy. Qos komandanyń da jaǵdaıdy ózgertýge birneshe márte tamasha múmkindikteri boldy. Ásirese, úshinshi kezeńde «Barys» baryn salyp oınady. Alaıda shaıba birde baǵanaǵa tıip keri qaıtsa, endi birde bizdiń jigitterge dáldik jetispedi. Básekeniń aıaqtalýyna bir mınýttaı ýaqyt qalǵanda Mıhal Iordan ekinshi goldy qaqpaǵa engizdi. Esep – 2:0.
Bul jaǵdaı jarys kestesine esh ózgeris engizgen joq. «Chernyshev» dıvızıonynda kósh bastap, Shyǵys konferensııasynda ekinshi orynyn saqtap qalǵan jerlesterimiz turaqty birinshiliktegi sońǵy kezdesýin 22 aqpanda Qytaıda jergilikti «Kýnlýn» klýbyna qarsy ótkizedi.
Ǵalym SÚLEIMEN,
«Egemen Qazaqstan»
