Atalǵan ýnıversıtettiń Baspasóz qyzmetiniń aqparaty boıynsha, Tárbıe jáne áleýmettik máseleler jónindegi departamentiniń uıymdastyrýymen qolǵa alynǵan joba qazaq halqynyń san ǵasyrlar boıy qalyptasqan tarıhı sanasyn damytý arqyly ulttyq tutastyqty saqtaý, óskeleń urpaqtyń boıynda ultjandylyq qasıetti qalyptastyrýdy kózdeıdi.
Joba aıasynda túrli sala mamandarynan jasaqtalǵan ekspedısııa Almaty oblysynyń aýdandaryna arnaıy saparmen bardy.
Departament dırektory Jańagúl Sultanovanyń aıtýynsha, sapar «Rýhanı jańǵyrý» baǵdarlamasyn júzege asyrý maqsatynda uıymdastyrylyp otyr. Joba aıasynda sala mamandary jergilikti aýyl turǵyndarymen kezdesý ótkizip, mektep oqýshylaryna túrli taqyryptar tóńireginde taǵylymdy dárister ótkizdi. Qaýzalǵan máseleler qatarynda jas urpaq boıynda estetıkalyq mádenıetti qalyptastyrý, adamgershilikke baýlý, sheshendik óner, ózin-ózi ustaı bilý mádenıeti, mektep oqýshylarynyń ata-ana men muǵalim, qorshaǵan ortaǵa degen qarym-qatynasyn jaqsartýdyń joldary men tásilderi bar. Sondaı-aq oqýshylardyń ósý prosesinde, olardyń jas jáne jeke pedagogıkalyq-psıhologııalyq erekshelikterine qaraı qaqtyǵystyń sebepteri men saldarlaryn anyqtaý jáne olardy sheshýdiń joldaryna arnalǵan trenıngter de kópshiliktiń qyzyǵýshylyǵyn týdyrdy.
Shara aıasynda Sarqan jáne Talǵar aýdandaryndaǵy birneshe mektepte «Umaı ana» arnaıy kabınetteri ashyldy. Onda qyzdarǵa ulttyq tárbıe berýge baılanysty taǵylymdy ister júzege asyrylmaq.
Bul ortalyqtar Qyzdar ýnıversıteti men bilim uıalarynyń ózara baılanysyn arttyryp, qyz balalarǵa tálimdi tárbıe berý baǵytynda qyzmet atqaratyn bolady.
Elvıra Serikqyzy,
«Egemen Qazaqstan»
ALMATY
