Otyrysty Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy Georgıı Kım ashyp, atalǵan zań jobasy 2016 jylǵy 10 maýsymda Qaýipsizdik Keńesiniń otyrysynda Elbasynyń bergen tapsyrmasy negizinde qabyldanǵanyn eske saldy. Senator atap ótkendeı, zań qabyldanǵan merzimnen úsh jyl ótti jáne sıfrlandyrý salasynda eleýli ózgerister oryn aldy. Osyǵan baılanysty 2021 jyly kúshine enýi tıis zańdy iske asyrý máselesi jiti qaraýdy qajet etedi.
IIM Jedel-qylmystyq departamentiniń bastyǵy Álisher Muhamedov pen Qarjy mınıstriniń orynbasary Tatıana Saveleva negizgi baıandama jasady.
Á.Muhamedovtyń aıtýynsha, IIM «Tulǵany bıometrııalyq sáıkestendirý» aqparattyq avtomatty júıesin qurý» memlekettik ınvestısııalyq jobasyn iske asyrýǵa ázirlik jumystary júrgizilýde. Osy jobada tıisti jabdyqty satyp alý, ony ornatý jáne iske qosý, júıeni qoldanysqa engizý jáne aqparat qaýipsizdigi talaptaryna sáıkes ony attestattaýǵa baılanysty jumystyń edáýir bóligi qamtylady.
Sonymen qatar, Á.Muhamedov atap ótkendeı, 2019-2021 jyldarǵa arnalǵan respýblıkalyq bıýdjette osy jobany iske asyrýǵa qarajat kózdelmegen. «Osy zańdy ýaqtyly iske asyrýdy qamtamasyz etý qajettiligin eskere otyryp, IIM aǵymdaǵy jyldyń birinshi jarty jyldyǵynda qarjylandyrylmasa, zańdy iske asyrýdy odan keıingi merzimge shegerý qajet dep esepteıdi», - dedi baıandamashy.
T.Saveleva qarjy mınıstrligi daktıloskopııalyq jáne genomdyq tirkeý týraly zańnamany materıaldyq-tehnıkalyq jáne qarjy-uıymdyq qamtamasyz etýge arnalǵan qajetti qarajatty bıýdjetke engizýge ázir ekenin jetkizdi. Alaıda, IIM quzyretti organ retinde qajetti tehnıkalyq-ekonomıkalyq negizdeme men tıisti saraptamalardyń qorytyndylaryn usynǵan joq.
UQK Aqparattyq qaýipsizdik departamenti basshysynyń orynbasary Vıktor Arsenov Zańdy kúshine engizý merzimderin 2021 jyldan 2020 jylǵa aýystyrý qajet dep sanaıdy. Bul bıometrııalyq málimetter men tulǵalardy sáıkestendirý júıesin engizý kózdelip otyrǵan memlekettik shekaradan ótýdi baqylaý júıesin tolyq jańartý jumysyn aıaqtaýǵa baılanysty.
Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń músheleri talqylaýǵa qatysty.
Depýtat Vladımır Volkov memlekettik organdardyń jumysynda úılesimdiliktiń bolmaýyna baılanysty alańdaýshylyq bildirdi. Onyń pikirinshe, múddeli mekemeler talqylanyp otyrǵan zańdy iske asyrý men basqa da quqyqtyq aktilerge monıtorıng jasaýdy tıimdi júzege asyrmaıdy. Sondaı-aq, senator ómirine qaýip tónetin kásip ókilderine qatysty daktıloskopııalyq tirkeýdi qoldaný salasyn keńeıtý IIM ókilderiniń nazaryn qajettigine aýdardy.
Senator Nurlan Beknazarov birqatar naqty usynys aıtty. Atap aıtqanda, keıinge qaldyrý shartymen bıýdjet jobasyna engizýden bas tartý úshin negizdemelerdiń tizimin zańnamalyq turǵyda bekitý qajet dep esepteıdi.
Depýtat qarjy mınıstrligin Parlament qabyldaıtyn zańdardy iske asyrý boıynsha qarjy josparyn bekitýge úndedi. Osy jospar naqty sharalar men olardy iske asyrý merzimderin jáne bıýdjet qarajattaryn bólýdi (saraptama ótkizý, tehnıkalyq-ekonomıkalyq negizdemeni, joba-smetalyq qujattamany memlekettik organdarmen kelisý merzimderin) qamtýy tıis.
Odan basqa, N.Beknazarov ákimshilik bıýdjet baǵdarlamalary úshin lımıtti anyqtaǵan kezde qarjy mınıstrligine jyl saıynǵy qajettilikterden tys qosymsha qarajat kózdelýin usyndy. Atalǵan barlyq sharalar qabyldanǵan zańnama aktilerin ýaqtyly jáne áýre-sarsańǵa salmaı iske asyrýǵa múmkindik beredi.
Senat depýtaty Sáýle Aıtpaeva talqylanyp otyrǵan zańdy qarjylandyrýdyń sozylyp ketýin synǵa alyp, zańdy iske asyrý barysyn Úkimet otyrysynda qaraýdy usyndy.
Senat komıtetiniń tóraǵasy Georgıı Kım otyrysty qorytyndylaı kele barlyq múddeli mekemelerdi zań erejelerin ýaqtyly jáne sapaly iske asyrý boıynsha birlese jumys júrgizýge shaqyrdy. Osy qujat memleket qyzmetiniń mańyzdy salalarynyń birin sıfrlandyrýǵa arnalǵan. Odan basqa, bul qujat qaýipsizdik jaǵdaıyna, vıza tártibi men memlekettik shekaradan ótýdi baqylaýǵa yqpal etedi.
