21 Aqpan, 2019

Smart-ómir – eldi sıfrlandyrý

290 retkórsetildi

Áıgili sózdi sál ózgertip aıtar bolsaq, «smart-ómir degenimiz – búkil eldi sıfrlandyrý...» Jalpy, bul búkil álemniń aldynda turǵan maqsat. Qazir damyǵan memleketterdiń deni sıfrlandyrýdyń shegine jetip qaldy. Dúnıedegi «Indýstrııa 4.0» túsinigi ekonomıka men óndiristi ǵana emes, adam ómiriniń negizgi bóligin smart-tirshilikpen tyǵyz baılanystyrýda.

Qazaqstan da bul ǵalamdyq úderisten tys qalmaýy tıis. Búginde osy maqsatty kóz­deıtin «Sıfrly Qazaqstan» baǵdarlamasy el tur­mysyna dendeı enip keledi. Negizi bul baǵ­darlama aıasynda el boıynsha ınternet qol­danýshylar sanyn 80 paıyzǵa jetkizý mindeti tur. 2020 jylǵa deıin osy mejeni ıgerýimiz kerek. Al eldiń aqparat salasyndaǵy sıfrly habar taratý úrdisi 95 paıyzǵa jetýi tıis. Sondaı-aq aldaǵy bir-eki jyldyń júzinde turǵyndardyń ǵalamtordy ıgerý saýaty da 80 paıyzdan asýy kerek. Munyń bári Memleket basshysy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýy já­ne «Bolashaqqa baǵdar: rýhanı jańǵyrý» at­ty baǵ­darlamalyq maqalasynda da naqty aıtylǵan. 

«Sıfrly Qazaqstan» baǵdarlamasynyń aımaqtarda júzege asýy adamdardyń qolaı­ly ómir súrýine bastaıtyn úrdis ekenin qaıta­lap jatý da artyq. Bul jerdegi jetistik qo­ǵam­­dy qaǵazbastylyqtan aryltyp, bıýro­kra­tııany joıýǵa deıin jetkizýi tıis. Al sıfr­landyrýdyń eń basty ereksheligi dep bar­lyq salaǵa batpandap enip ketken sybaılas jem­qorlyqtyń jolyn kesýge múmkindik beretin jaqtaryn aıtýymyz kerek.

Bul baǵyttaǵy jumystar Almaty oblysynda óz deńgeıinde júrgizilip jatyr deýge naqty negiz bar. Qazir óńirde «Sıfrly Qazaq­stan» baǵdarlamasy aıasynda jumystar ár sala boıynsha júrýde. Mysaly, ótken jyly bilim berý salasynda bul qadam sátti júzege asty. Oblys boıynsha balabaqsha kezegine ótinish berýge avtomattandyrý júıesi engi­zildi. Bul júıege aımaqtaǵy mektepke deıingi 951 uıym tirkeldi. Osy balabaqsha keze­gine qatysty sıfrlandyrý jumysy 81,4 pa­ıyzǵa jetken eken. Munan bólek, oblysta «Smart-kolledj» qanatqaqty jobasy iske qo­syl­dy. Bul óńirdegi kolledjderde bilim berý ú­derisin avtomattandyrýǵa múmkindik beredi. Al mektepterdiń kompıýter tehnıkasymen jab­dyqtalýy 100 paıyzǵa oryndalyp, sıfr­ly kabınetterdiń sany 11275 bólmege jetti. Bilim berý nysandaryn jyldamdyǵy joǵary ınternetpen qamtý 56 paıyzǵa artqan eken. 

Oblysta «Jetisý» medısınalyq aq­pa­rattyq júıesi qoldanysqa engizilip jatyr. Bul boıynsha densaýlyq saqtaý salasyndaǵy barlyq uıymdar medısınalyq aqparat júıesine tolyq qosylǵan. Onyń ishin­de aýdandyq deńgeıdegi qamtý 69,9 paıyzdy qurapty. Jalpy densaýlyq saq­taý salasynda elektrondy formatqa 117 medısınalyq nysan kóshken. Qazir qaǵazsyz qujat aınalymy 53 paıyzǵa deıin kóbeıdi. Esep boıynsha óńir turǵyndarynyń 83 paıyzynda elektrondy densaýlyq pasporty bar. Jaqynda Taldyqorǵan qalasynyń jedel járdem stansasy «Kómek 103» sıfrly júıesine tolyqtaı qosyldy. Bul naýqastardyń shaqyrýyn jedel qabyldap, dárigerlik kómekti ýaqtyly kórsetýge jol ashty.

Byltyr turǵyn úı-kommýnaldyq sharýa­shy­lyq salasynda 9 turǵyn úı «e-Shańy­raq» biryńǵaı zııatkerlik aqparattyq júıe­sine qosylǵan eken. Nátıjesinde tuty­nylǵan jáne jetkiziletin kommýnaldyq qyz­met­terdi baqylaý jáne monıtorıng bo­ıynsha shyǵyndar 30 paıyzǵa tómendedi. Jal­py sıfrlandyrý baǵdarlamasynyń «Qalany basqarý» baǵytyn iske asyrý aıasynda «Smart Taldykorgan» mobıldi qosym­shasy ázirlengen. Bul qyryqtan astam qalalyq servıs qyzmetine ınternet arqyly qosylýǵa múmkindik beredi. Oblys ortalyǵynda «Aqyldy jaıaý júrginshi ótke­li» iske qosylǵan. Birneshe «Smart» aıaldama kesheni ornatyldy.

Sondaı-aq Almaty oblysynyń quqyq qorǵaý salasy da sıfrly qyzmet kórsetýge kóship jatyr. Mysaly, «Elektrondy qyl­mys­tyq is» jobasy sheńberinde qylmys­tyq isterdi tergeý elektrondy formatta júr­gizi­lýde. Bul maqsatta 300 arnaıy jumys or­ny ashyl­ǵan. Nátıjesinde tergeý júr­gizý mer­zimi qysqaryp, is materıaldaryn bur­malaý táýe­keli azaıdy.

– «Sıfrly Qazaqstan» baǵdarlamasy aıasynda sıfrlandyrý úderisi barlyq ómir súrý salasyna qatysty jáne memleketimizdiń ár turǵynynyń ómir súrý deńgeıin arttyrýǵa baǵyttalǵan. Bul baǵyttaǵy jumystyń bir para­syn «Jetisý – adaldyq alańy» jobalyq keńsesine qatysty aıtýǵa bolady. Jobalyq keńse ashylǵaly beri jumys toby 12 otyrys ótkizdi. Al jaqynda ǵana oblystaǵy memlekettik qyzmet kórsetýdi sıfrlandyrý boıynsha eki máseleni talqyladyq. Birinshisi, Memlekettik kirister departamenti bastamashy bolyp otyrǵan «Memlekettik qyzmetti jedel kórsetý dóńgelekti keńse» jobasy. Bul boıynsha salyq mindettemelerin esep­tep, qabyldaý úshin eldi mekenderge arnaıy jabdyqtalǵan kólik shyǵarý jospar­lanǵan. Onyń qyzmeti tolyqtaı sıfrlanady. Nátıjesinde, salyq tóleýshilerdiń jumysy jeńildep, qaǵazbastylyq azaıady. Ekinshi jobany «BilimMediaGroup» kompanııasy usynyp otyr. Bul bilim salasyndaǵy qyz­metterdi avtomattandyrý arqyly sybaılas jemqorlyq qaýipin tómendetýge baǵyttalǵan, − deıdi Memlekettik qyzmet isteri jáne sybaılas jemqorlyqqa qarsy is-qımyl agenttigi Almaty oblysy boıynsha departamentiniń basshysy Serikbaı Nurǵısaev.

Qalmahanbet MUQAMETQALI,

«Egemen Qazaqstan»

Almaty oblysy

Sońǵy jańalyqtar

Búgingi jańalyqtar (27.02.2020)

Vıdeo • Búgin, 18:45

Basylym basshylary - Erkin QYDYR (1962)

Basylym basshylary • Búgin, 17:05

Karateshiler Aýstrııada aıqasady

Sport • Búgin, 16:26

Almatyda sel júrý qaýpi joq

Aımaqtar • Búgin, 16:23

Biz birgemiz: Aleksandr Baraev

Vıdeo • Búgin, 13:52

Álemniń 50 elimen jumys isteıtin oblys

Qazaqstan • Búgin, 12:58

Uqsas jańalyqtar