Qaı sharýasyn bolsyn kesheýildetip qaýzaıtyn aǵaıynnyń qysqy soǵymnan dám tatyrýy naýryzǵa deıin sozylyp ketetini bar. Taıaýda el aqsaqaly sanatyndaǵy syıly aǵamyzdyń biri telefon shalǵan. Sharýasy – qazaqtyń dástúrli ánderin náshine keltire oryndaıtyn ári sol ánderdiń tarıhynan áriden qaýzap syr sherte alatyn ónerpaz bolsa deıdi. Úlken kisiniń ótinishin aıaqsyz tastaý uıat. Qabyl alǵanbyz. Izdedik. Izdegenimizdi taptyq ta. Qazir óner adamdarynyń osyndaı jıyn-toıda az-muz tıyn-teben tabatynyn eldiń bári biledi ǵoı. Úlken qalalardaǵydaı ataq-dańqy jer jarǵan aıtýly ánshilerdeı emes, bizdegi ónerpazdardyń bási belgili. Ile habarlasyp edik, Aqan seri, Birjan sal, Úkili Ybyraı ánderin náshine keltire oryndaıtyn jigit aǵasy kelisimin berdi. Án aıtyp qana qoımaı, úı ıesiniń jón silteýine oraı kezek-kezek sóz berip, omyrtqanyń óńin kirgizip basqaryp ta bermek.
Sol eńbegine suraıtyny 25 myń teńge.
Sharýasyn tyndyrǵanymdy aǵama jetkizgenmin. Qýanýdyń ornyna kúmiljip qaldy. Qymbat eken dedi.
– Arzany tabylmaı ma?! – dep surady aǵam qutty bir han bazardyń ortasynda júrgendeı, – taǵy da izdep kórseń qaıtedi. Álde úıge barǵan soń qabyrǵammen keńeseıin be? Jasyratyn eshteńe joq, áne bir dókeı bastyq bolyp isteıtin inishekti de shaqyrǵanmyn. Ol ózi qymbat araq ishedi. Bótelkesi 250 myń teńge.
– Ondaı da araq bola ma? – dep surappyn men.
– Bolǵanda qandaı, – dedi aǵam, – sen ózi túk bilmeıdi ekensiń ǵoı. Álgi ánshiniń qyzmeti qymbat dep turǵanym sol ǵoı.
Iá, aǵam aıtsa aıtqandaı. Tól ónerimizdi baǵalaı almaı júrgenimiz de osydan-aý.
Baıqal BAIÁDIL,
«Egemen Qazaqstan»
