Oqý úrdisiniń osy kezeńinde áskerı baılanysshylar vzvodtardyń úılesimdiligin aıaqtap, vzvod quramyndaǵy jaýyngerlik tapsyrmalardy oryndaýǵa kirisip ketti. Baılanys rotalarynyń komandırleri baǵynyshty jeke quramnan normatıvter men synaqtardy qabyldap, olardyń is-qımyldaryna naqty baǵa berdi. Vzvod jeke quramy dabyl boıynsha is-áreketterin pysyqtap, dalalyq jaǵdaıda baılanys quraldaryn jaıyp-qurap, baılanys ornatýmen jáne baılanyspen qamtamasyz etýmen aınalysty.
Taktıkalyq-arnaıy jattyǵýlar - jaýyngerlerdiń fýnksıonaldyq mindetterin oryndaý ádisi bolyp tabylady. Bul rette, bólimshe komandırleri jeke quramdy oqytýmen qosa, olardy basqarý boıynsha da tájirıbe alady, sonymen qosa urystyń kez-kelgen formatynda baılanysty ornatýdyń qolaıly jáne tıimdi tásilderin izdestiredi.
Búgingi kúni, taktıkalyq-arnaıy sabaqtar - áskerlerdiń dalalyq oqytylýy men mashyqtylyǵyn arttyrýdaǵy basty quraly retinde qalyptasyp qaldy. Sebebi, osy sabaqtar barysynda jeke quram bar teorııalyq bilimderin pysyqtaýmen qatar, keshendi túrde baılanys ornatý, túrli klımattyq jáne beıtanys meken jaǵdaıynda baılanysty ornatý mashyqtylyǵyn arttyrady.
«Batys» óńirlik qolbasshylyǵynyń baılanysshylary udaıy jaýyngerlik kezekshilikte júrip, táýliktiń kez-kelgen ýaqytynda áskerlerdi turaqty jáne sapaly baılanyspen qamtamasyz etýge ázir. Baılanys – áskerdi jáne urysty basqarýdyń basty amaly men kózi, sondyqtan áskerı baılanysshylarǵa úlken talaptar qoıylady, aqparatty jedel, bir ýaqytta birneshe obektige, túrli araqashyqtyqqa jetkizý baılanysshylardyń moıynynda árdaıym qala bermek.
Gúlaıym ShYNTEMIRQYZY,
«Egemen Qazagstan»
Mańǵystaý oblysy
