Oblystyq tótenshe jaǵdaılar departamenti basshysynyń orynbasary Rashıd Blıalov: «Mundaı anyqtaǵyshtardy ornatqan úılerde ýly gazdardan zardap shegý oqıǵalary bolmaıdy. Apat bolǵan jaǵdaıda qurylǵy gazdy birden toqtatady», - deıdi.
Astanadaǵy bes balanyń qaıǵyly qazasynan keıin, shyny kerek, óńirlerde de tótenshe jaǵdaılardyń aldyn alý jumystary kúsheıtildi. Munaıly aımaqta turǵyn úı sektorynda órtke qarsy jáne aldyn alý jumystaryn uıymdastyrý boıynsha jedel shtab quryldy. Sońǵy eki aptanyń ishinde tótenshe jaǵdaılar departamentiniń qyzmetkerleri 4 myńǵa jýyq turǵyn úımen túsindirý jumystaryn júrgizip, peshter men elektr jabdyqtaryn paıdalaný kezinde órt qaýipsizdiginiń talapqa saı bolmaýynyń 68 deregin tirkegen.
2018-2019 jyldardaǵy jylý berý maýsymynda oblysta kómirtegi totyǵy men tabıǵı gazdan ýlanýdyń 2 oqıǵasy boldy. Departament mamandary ótken jyly tirkelgen 323 órttiń 90-y turǵyndardyń abaısyzdyǵynan jáne jeteýi balalardyń otpen oınaýynan bolǵanyn aıtady.
Baqytgúl BABASh,
«Egemen Qazaqstan»
ATYRAÝ
