Májiliske kelip túsken zań jobalarynyń ishinde mindetti áleýmettik saqtandyrý týraly zań jobasy jáne oǵan ilespe zań jobasy bar.
Atalǵan qujat mindetti áleýmettik saqtandyrýdyń quqyqtyq, ekonomıkalyq jáne uıymdastyrýshylyq negizderin nyǵaıtýǵa baǵyttalǵan. Atap aıtqanda, mindetti áleýmettik saqtandyrý júıesine qatysý ótili men mindetti áleýmettik saqtandyrý qorynan tólenetin áleýmettik tólemderdiń mólsheri arasyndaǵy ózara baılanysty kúsheıtý qarastyrylǵan.
Sondaı-aq jalpy otyrysta Májilis depýtattary «Qazaqstan Respýblıkasy men Vetnam Sosıalıstik Respýblıkasy arasyndaǵy qylmystyq ister boıynsha ózara quqyqtyq kómek týraly shartty ratıfıkasııalaý týraly» zań jobasyn maquldady. Bul shartty ratıfıkasııalaý qylmyspen kúreste eki el arasyndaǵy yntymaqtastyqtyń tıimdiligin arttyrýǵa baǵyttalǵan.
Atalǵan qujatqa 2017 jyldyń maýsymynda Hanoıda qol qoıylǵan.
– Shart qylmystyq ister boıynsha quqyqtyq kómekti kórsetý máselelerin retteıdi, sondaı-aq jasalǵan qylmys turǵysynda kúdiktiniń kinásin dáleldeýge qajetti tergeý amaldaryn júrgizý eskerilgen. Jalpy, bul shart standartty qujat bolyp sanalady, – dedi zań jobasy boıynsha baıandama jasaǵan Bas prokýrordyń orynbasary Andreı Lýkın.
Baıandamashynyń aıtýyna qaraǵanda, shartty ratıfıkasııalaý eki eldiń qylmyskerlikpen kúrestegi yntymaqtastyǵynyń tıimdiligin arttyrýy tıis. Qazirgi ýaqytta osyndaı sharttar 27 elmen bekitilgen. Sonymen qatar qazir Kýbamen, Grekııamen jáne Makedonııamen arada osy tektes qujatqa qol qoıý máselesi pysyqtalýda.
– Vetnammen yntymaqtastyq aıtarlyqtaı belsendi túrde damyp keledi. Bul memleket Ońtústik-Shyǵys Azııada biz úshin tartymdy elderdiń biri bolyp otyr, ıaǵnı ekonomıkalyq turǵyda baılanystar nyǵaıtylýda, – dedi A.Lýkın.
Jalpy, Qazaqstan men Vetnam arasynda ótken jyly saýda aınalymy 500 mln AQSh dollarynan asqan. Sondaı-aq memleketter arasynda tikeleı áýe reısteri ashylǵan.
Jalpy otyrysta Qazaqstan Prezıdentiniń Jarlyǵymen Parlament Májilisiniń depýtaty Saparhan Omarovtyń Aýyl sharýashylyǵy mınıstri bolyp taǵaıyndalýyna baılanysty depýtattyq ókilettigi merziminen buryn toqtatyldy.
Sonymen qatar palata Májilistiń Agrarlyq máseleler komıtetiniń tóraǵasy laýazymyna Berik Ospanovty saılady.
Serik ÁBDIBEK,
«Egemen Qazaqstan»
