Gala-opera – bul otandyq ári álemdik opera klassıkasynyń jaýharlarymen birge mýzykalyq tosynsyılardy qamtyp, únemi aýqymdy baǵdarlamaǵa qurylatyn joba. Kóktemgi merekeler qarsańynda jurtshylyq nazaryna qazaqstandyq kompozıtorlar – E.Rahmadıev, S.Muhamedjanov jáne klassıkter – Dj.Rossını, Dj.Pýchchını, Dj.Verdı, G.Donısettı, P.Maskanı, J.Massne, J.Offenbah, K.Sen-Sans, A.Dvorjak, A.Borodın t.b. sazgerlerdiń kórermen kóńiline jaqyn shyǵarmalary ázirlengen.
- Atalmysh gala-konsert basqalarynan óziniń tutastyǵymen erekshelenedi, ol klasterlik júıege qurylǵan: aspaptyq jáne vokaldyq nómirlerdiń kópshiligi ózara baılanysqan. Máselen, Dj.Verdıdiń «Taǵdyr kúshi» operasynyń ývertıýrasy osy operadaǵy Leonoranyń arııasymen jalǵasady, sondaı-aq P.Maskanıdiń «Aýyl abyroıy» operasy Santýssanyń arııasymen jáne ıntermessomen usynylady. Dj.Pýchchınıdiń áıgili «Manon Lesko» operasyna taǵy bir klaster arnalǵan: tyńdarmanǵa ıntermesso, Manon arııasy men de Grıe arııasyn usynamyz. «Astana Opera» teatrynyń jetekshi solısteri Medet Chotabaev pen Maıra Muhamedqyzy oryndaıtyn Dj.Pýchchınıdiń «Bogema» operasynan sahnalyq kórinister keshtiń kórkin asha túspek. Konsert A.Borodınniń «Knıaz Igor» operasynan ataqty Qypshaq bıimen aıaqtalady, - dep atap ótti maestro Abzal Muhıtdınov.
Konsertke QR Memlekettik syılyǵynyń laýreattary Súndet Baıǵojın (Qazaqstannyń eńbk sińirgen qaıratkeri), Maıra Muhamedqyzy (Qazaqstannyń eńbek sińirgen ártisi), Qazaqstannyń eńbek sińirgen ártisteri – Jannat Baqtaı, Ǵalııa Baıǵazınova; Qazaqstannyń eńbek sińirgen qaıratkerleri – Jupar Ǵabdýllına, Bıbigúl Januzaq, Dına Hamzına, Medet Chotabaev, Jan Tapın, Meıir Baınesh, Talǵat Musabaev, Janat Shybyqbaev; Armenııanyń Halyq ártisi Barseg Týmanıan; halyqaralyq baıqaýlardyń laýreattary – Elena Ganja, Saltanat Muratbekova, Tatıana Vısınskaıa, Gúljanat Sapaqova, Beıimbet Tańaryqov, Ramzat Balakıshıev, Bolat Esimhanov jáne t.b. qatysady. Bas hormeıster – Qazaqstannyń eńbek sińirgen qaıratkeri Erjan Dáýitov. Konsert rejısseri – Erenbaq Toıkenov.
