Biraq bul qoıylym kórermenderge maǵynasyz, jyrtań kúlki bolǵan joq, «ázildiń túbi – zil» degendeı, sahnada aıtylǵan ázil-qaljyńnyń, sıýjettiń astarynda búgingi kúnniń áleýmettik máselesi de jatyr edi. Ssenarıı avtory Abylaı Maýdan men rejısserler Álııa Baımahan, Dos Qudash jeńil qaljyńdaı otyryp, bas keıipker Naýryzbaı sekildi qyryqqa deıin úılenbeı júrip alatyn bozbalalardyń, úıinde otyryp qartaıatyn kári qyzdardyń máselesin kóteredi. Sahnalyq qoıylym otbasylyq qundylyqtardyń quldyrap bara jatqandyǵyn, sonymen qatar halqymyzben týa bitti jasasyp kele jatqan keıbir dástúrlerimizdiń de boıaýy kómeskilengenin kóteredi. Otbasy ınstıtýtynda jeńgeler roliniń mańyzy báseńdegenine de qazaqtyń boıy úırengeli qashan?
«Bastańǵyda» otyryp qansha kúlsem, sonsha oıǵa qaldym. Rasynda, qazir úılenbeıtin, sol júrisin uıat sanamaıtyn, ýaıym etpeıtin azamattar jeterlik. Nekege turmaı, nekesin qıdyrmaı azamattyq nekemen tura beretinder qanshama? Qyzdarymyzdyń qalyp qoıatyny da azamattardyń osylaı arzandaýynan ǵoı, oǵan qalaı qarsy turýǵa bolady? – deıdi kórermen Gúlsim Sadaqbaeva.
Qostanaı teatrynda «Bastańǵy» osymen úshinshi jyl qoıylyp keledi. Alǵashqy jyldary muny tek jastar ǵana uıymdastyryp edi. Bıyl teatrdyń Shaharbaný Esenǵulova, Qonysbek Begaıdarov sekildi aǵa býyn akterleri de qatysypty. Súrboıdaq Naýryzbaıdyń rolin Jumataı Ahmethan, jeńgesiniń rolin Zámzágúl Begaıdarova alyp shyqty.
Názıra JÁRIMBET,
«Egemen Qazaqstan»
Qostanaı
