«Polısııa departamenti bastyǵynyń birinshi orynbasary Qaırat Orazalın bastaǵan qaıyrymdylyq top «Petropavl balalarǵa áleýmettik qyzmet kórsetý» ortalyǵynda aýyr naýqastan emdelip jatqan júzden astam búldirshinge syı-sııapattarmen qosa vokaldyq toptyń konserttik baǵdarlamasyn usyndy.
«Mundaı aksııalar barshamyzdyń ómirlik maqsattarymyzdy biriktiredi. Biz balalardyń tezirek saýyǵyp ketýin, qabaqtaryn muń shalmaýyn tileımiz», dedi polısııa polkovnıgi.
Jumysshy kentindegi qarttar úıinde turyp jatqan otyz shaqty zeınetkerge de tartý-tarylǵylar úlestirildi. Solardyń biri 83 jastaǵy Valıa keıýananyń aýrýhanadan shyqqan beti eken.
Polıseıler Taıynsha jáne Aqqaıyń aýdandaryndaǵy qarttar men múgedekterge arnalǵan ınternat-úılerinde boldy. Qaırat Orazalın bıyl 100 jasqa tolǵaly otyrǵan tyl eńbekkerin merekemen quttyqtap, gúl shoǵyn syılady. Mekemelerge turmystyq tehnıka, al turǵyndarǵa án-kúı tartý etildi.
Jambyl aýdanynyń az qamtylǵan otbasylarynan 18 bala kınologtarda qonaqta boldy. Mamandar balalardy tórt aıaqty kómekshilerdiń jumysymen tanystyrdy. Munda balaqaılar ponıǵa minip, serýendedi. Akvaparkti armansyz aralady.
О́mir ESQALI,
«Egemen Qazaqstan»
Soltústik Qazaqstan oblysy
