Kesenege keldi. Qasym-Jomart Toqaev «Áziret Sultan» memlekettik tarıhı-mádenı qoryq-mýzeıiniń arheologııalyq jáne arhıtektýralyq eskertkishterimen tanysyp, Qoja Ahmet Iаsaýı kesenesin aralap kórdi. Memleket basshysyna mádenı nysandardyń qaıta jóndeý jumystary jáne qoryq-mýzeıdiń aýmaǵyn abattandyrý barysy jóninde baıandaldy. Sonymen qatar oblys ákimdiginiń, basqarmalar men departamentterdiń ákimshilik ǵımarattaryn, sondaı-aq Kongress-holdy, Medıa ortalyǵyn, «Uly dala eli» ortalyǵyn, oqýshylar saraıyn, týrızm kolledjin, «Astana» alańyn, áýendi sýburqaqty, halyqqa qyzmet kórsetý ortalyǵyn jáne basqa da áleýmettik-mádenı maqsattaǵy nysandardy salý barysy týraly esep berildi.
Jastarmen jolyqty. Qasym-Jomart Toqaev jumys sapary barysynda jastardyń resýrstyq ortalyǵynyń jumysymen de tanysty. Prezıdentke jastardyń shyǵarmashylyq bastamalaryna, kásipkerlikpen aınalysýyna qoldaý kórsetý, olardyń jumyspen jáne baspanamen qamtylýyn úılestirý, jastarǵa quqyqtyq kómek kórsetý sııaqty negizgi jumys baǵyttary jóninde baıandaldy. Erkin áńgimelesý barysynda jastar Qasym-Jomart Toqaevqa «Jastarǵa qyzmet kórsetý», «Eriktiler klýby», «Jas sarbaz», «Tilder mektebi» atty taqyryptyq sektorlardyń, bilim berý salasyndaǵy «Stem» jobasynyń, sondaı-aq «TURKISTAN HUB» kovorkıng ortalyǵynyń jumystary týraly aıtty.
Turǵyn úılerdiń qurylysymen tanysty. Prezıdent Túrkistan qalasynyń «Otyrar» shaǵyn aýdanyna baryp, «Nurly jer» baǵdarlamasy boıynsha salynyp jatqan 26 jańa úıdiń qurylysymen tanysty. Qazaqstan Prezıdentine osy baǵdarlama aıasynda 2019 jyldyń sońyna deıin jalpy aýmaǵy 96 200 sharshy metrdi quraıtyn 1560 páter paıdalanýǵa beriletini habarlandy.
Jurtshylyq ókilderimen kezdesti. Memleket basshysy, budan bólek Túrkistan oblysynyń jurtshylyǵymen de jolyqty. Prezıdent is-sharaǵa qatysýshylardy Naýryz merekesimen quttyqtap, jańarý men jańa ómirdiń bastalýyn sıpattaıtyn bul merekeniń rýhanı baı muramyzdyń jarqyn sımvolyna, úzdiksiz urpaq sabaqtastyǵyna jáne Qazaqstan halqy birliginiń negizine aınalǵanyn atap ótti.
– Elbasynyń bıylǵy 19 naýryzda qabyldaǵan sheshimi memleketimizdiń bolashaǵyna degen shynaıy qamqorlyqty bildiredi. Osyndaı syndarly kezeńde Elbasyn jáne meni qoldaǵan barsha halqyma rızashylyǵymdy aıtqym keledi, – dedi Qasym-Jomart Toqaev. Memleket basshysy óziniń el Prezıdenti retindegi alǵashqy saparynyń qazaq mádenıetiniń, tarıhy men rýhanııatynyń ortalyǵy sanalatyn Túrkistan qalasynan bastalýynyń sımvoldyq máni zor ekenin aıtty.
– Túrkistan – memleketimizdiń altyn besigi. Elbasynyń bul qalaǵa erekshe mártebe berý týraly sheshimi kezdeısoq emes. Ejelgi Túrkistannyń jańǵyrýy men jańarýy damý jolymyzdyń durystyǵyn kórsetedi. Aldaǵy jumystarym týraly jáne qoǵamdy tolǵandyrǵan máselelerdi sheshýge baılanysty oıymdy dál osy jerde bóliskim keledi, – dedi Qazaqstan Prezıdenti. Qasym-Jomart Toqaev barsha qazaqstandyqtardy birinshi kezekte tolǵandyratyn máseleler týraly aıta kelip, eń aldymen, ádilettilikti kúsheıtý qajettigine toqtaldy.
– Qoǵamdaǵy ádilettilik, eń aldymen, atqarýshy bılikke baılanysty. Úkimettiń, mınıstrlerdiń, barlyq deńgeıdegi ákimderdiń, polısııanyń, prokýratýranyń, sottardyń maqsaty – azamattardyń quqyǵyn qorǵaý. Bul – olardyń konstıtýsııalyq mindeti ári azamattyq boryshy, – dedi Memleket basshysy. Qazaqstan Prezıdenti sybaılas jemqorlyqqa qarsy kúres kúsheıe túsetinin aıtyp, oryndy shaǵym túsken jaǵdaıda ortalyq jáne jergilikti organdardyń basshylary tikeleı jaýap beretinin atap ótti. Qasym-Jomart Toqaev memlekettik qyzmetshilerdiń halyqpen tyǵyz jumys isteýi qajet ekenine basa mán berip, basshylardyń halyq aldyndaǵy esep berý kezdesýleriniń qazirgi formatyn synǵa aldy. Memleket basshysy eńbeksúıgishtik pen sińirgen eńbekke oraı marapattaý qundylyqtarynyń ıdeıasy ulttyq ıdeologııamyzdyń bastaýynda turýy qajet ekenin aıtty.
– Biz azamattarymyzdyń, eń aldymen, jastardyń jumysqa ornalasýyna jáne kásibı turǵydan ósýine jaǵdaı jasaýǵa tıispiz. Shetelde jumys istep jatqandardyń áleýetin elimizde paıdalaný múmkindigin qarastyrýymyz kerek. Sonda biz kúsheıe túsemiz. Sonymen qatar jumys tabýǵa umtylmaıtyndardy, ásirese áleýmettik masyldyqty qoldaýǵa bolmaıdy. Memleket áleýmettik jaǵdaıy nasharlarǵa kómek kórsetetin bolady. Qalǵandarynyń bári jumys isteýge tıis, – dedi Qazaqstan Prezıdenti. Oǵan qosa, Úkimetke bıýdjetti tek memleketimizdiń damýyna jáne qaýipsizdik maqsattaryna oraı qaıta beıimdeýdi, sondaı-aq ımıdjdik is-sharalarǵa arnalǵan shyǵyndardy azaıtýdy tapsyrdy.
– Memlekettik shyǵystardyń basty mindeti – qarapaıym adamdardyń máselelerin sheshý. Aýyz sý, baspana, jumys oryndary, jaıly ómir úshin ınfraqurylym – osylardyń bári el turǵyndaryn alańdatady. Mine, biz osy mindetterdi sheshetin bolamyz. Mınıstrler men ákimderdiń jumysyn naqty problemalardy sheshý nátıjeleri boıynsha baǵalaıtyn bolamyn, – dedi Qasym-Jomart Toqaev.
Sonymen qatar Qazaqstan Prezıdenti rýhanı jańǵyrý máselelerine toqtalyp, Elbasynyń «Rýhanı jańǵyrý» baǵdarlamasy jáne «Uly dalanyń jeti qyry» atty maqalasyndaǵy baǵyttardy odan ári júzege asyrýdyń mańyzdylyǵyn aıtty.
Kezdesý barysynda Jastar jylyn ótkizý isine de erekshe nazar aýdaryldy.
– Biz jastar úshin jańa múmkindik berýimiz kerek. Sonyń ishinde olardyń bıznespen aınalysýyna, bilim alýyna, jumysqa ornalasýyna, tabys tabýyna jol ashý qajet. О́z ómirin jaqsartýǵa, mansaby boıynsha joǵarylaýǵa arnalǵan áleýmettik lıftiler is júzinde jumys isteýi kerek. Elimizdiń jastary men talantty azamattary memlekettik qyzmette ilgerileý úshin arnaıy kadrlyq baǵdarlama daıyndaımyz. Bolashaǵymyz jastardyń qolynda, – dedi Qasym-Jomart Toqaev. Sońynda Memleket basshysy óziniń Prezıdent retindegi negizgi ustanymdary sabaqtastyq, ádilettilik jáne ilgerileý ekenin atap ótti.
Shymkent qalasyna bardy. Memleket basshysy Qasym-Jomart Toqaev jumys sapary barysynda Shymkent qalasyna kelip, onda ornalasqan ákimshilik-iskerlik ortalyǵyn aralap, «Shymkent city» jańa aýdanynyń maketin, áýejaıdyń jańa termınalyn kórdi. «Eski qalashyq», Qoshqar ata ózeniniń jaǵalaýyn abattandyrý jáne «Turan» shaǵyn aýdanynyń ınjenerlik ınfraqurylymyn salý jobalarymen tanysty. 20,5 gektar aýmaqty qamtıtyn ákimshilik-iskerlik ortalyq zamanaýı ınfraqurylymymen, ómir súrýge jáne bıznes júrgizýge qolaıly jaǵdaı jasalǵandyǵymen erekshelenedi, sondaı-aq qala qurylysy men sáýletiniń qazirgi standarttaryna saı keledi. Qalanyń jańa aýdanynda jalpy aýmaǵy 201,2 myń sharshy metrdi qamtıtyn 2 990 páteri bar 47 úı salý josparlanýda.
Bıznes ókilderimen kezdesti. Qasym-Jomart Toqaev jeke kásipkerlermen de jolyǵyp, olardyń shyǵaryp otyrǵan ónimderimen de tanysty. Sonyń biri – toqyma óndirisindegi jip ıirý, óńdeý jáne tigin tigýmen aınalysatyn «AZALA Textile» jaýapkershiligi shekteýli seriktestigi. Sonymen qatar Memleket basshysyna «Ońtústik» arnaıy ekonomıkalyq aımaǵynyń bazasynda jumys isteıtin óndiristik kásiporyndar jóninde málimet berildi. Solardyń qatarynda «Bal tekstıl» JShS-niń kilem jáne kilem ónimderi fabrıkasy, «Álem-BT» JShS-niń shulyq fabrıkasy, «PK «AGF Grýpp» JShS-niń konveıerli tigin fabrıkasy, «SP «Lux shoes» JShS-niń aıaq kıim fabrıkasy, «Tumar Textile» JShS-niń oramaldar men halattar tigetin fabrıkasy jáne basqa da kásiporyndar bar. Budan bólek, Qazaqstan Prezıdenti «MEDIKER 4K» medısına mekemesiniń jumysymen tanysyp, dárigerler bólmelerin aralap kórdi. Atalǵan kompanııanyń «Medıker» emhanasy respýblıkalyq emhanalar jelisiniń fılıaly sanalady. Bul mekeme sıfrly medısına, dıagnostıka jáne sporttyq medısına sııaqty baǵyttar boıynsha jumys isteıdi. Osylaısha Prezıdent Túrkistan oblysyndaǵy sapary barysynda óńirdiń tynys-tirshiligimen tanysyp, qoǵamnyń túrli ókilderimen kezdesip, óziniń oı-pikirlerimen bólisti.
Ǵalymjan ELShIBAI,
Nurshat TО́KEN,
«Egemen Qazaqstan»
