Qordyń lentasyn Qazaqstan Jazýshylar odaǵynyń múshesi, aqyn, aýdarmashy Murat Sultanbekov pen Jýrnalıster odaǵynyń múshesi, shejireshi-etnograf Moldabek Janbolatov qıyp, jastardy Serikqazy Qorabaıdan úlgi alýǵa shaqyrdy. Kezdesý barysynda Shákárim ýnıversıtetiniń janynan qurylǵan Abaı ınstıtýtynyń dırektory Aqmaral Smaǵulova Serikqazy Qorabaıdyń ultjandylyǵy men týǵan jerge qurmetin jáne Abaıdy zertteýge qosqan úlesin erekshe atap aıtty. Serikqazy Qorabaı óz kezeginde kóptegen ıgi áńgimelerimen, týǵan jerge degen saǵynyshymen bólisti. Abaı atyndaǵy kitaphananyń Aqparattyq-bıblıografııalyq qamtamasyz etý bóliminiń basshysy Jańylgúl Manjıbaevanyń aıtýynsha, ǵasyrdan uzaq tarıhy bar qara shańyraq – Abaı atyndaǵy kitaphananyń tól tarıhy kemeńger aqyn Abaı esimimen egiz óriledi.
– Bizdiń kitaphana 1883 jyly qazan aıynyń 3-i kúni esigin eń alǵash ret óz oqyrmanyna aıqara ashqan kúnnen bastap, Abaı Qunanbaıuly turaqty oqyrmandarynyń qatarynda bolǵan. Tipti ómiriniń sońyna deıin kitap alyp, úzbeı oqyǵanyn abaıtanýshy ǵalymdardyń, jerles jazýshylardyń shyǵarmalarynan aıqyn bilemiz, – dedi Jańylgúl Manjıbaeva. – Abaı men kóne shahar Semeıdiń qoǵamdyq kitaphanasynyń baılanysyn tarıhta eń alǵash jazǵan adam, ol Djordj Kennan edi. 1885-jyly qalamyzǵa saıahaty barysynda amerıkan pýblısısi Djordj Kennan óziniń 1906 jyly orys tilinde shyqqan «Sibir jáne súrgin» kitabynda osyny derek retinde jazsa, bul kórinis kórkem ádebıette Muhtar Áýezovtiń qalamymen «Abaı joly» roman-epopeıasynda kórinis tapqan bolatyn. Qazirgi ýaqytta Abaı atamyzdyń ózi sııaqty osy kitaphanadan jastar rýhanı azyq alsyn dep, jıǵandaryn tabystap otyrǵan Abaıdy zertteýshi professor Serikqazy aǵamyzǵa dán rızamyz.
Jańylgúl Ádilbekqyzynyń bul sózin rastaǵandaı Serikqazy Qorabaı da Abaıdy zertteý úshin Máskeýge saparynda ǵylymı ortalyqtarda, muraǵattarda bolyp, joǵaryda aıtylǵan Djordj Kennannyń esteligin mysalǵa keltirip, sol zamanda jaryq kórgen kóptegen fılosofııalyq shyǵarmalarmen Abaıdyń tanys bolǵany týraly aqparattar jınaǵanyn jetkizdi. Serikqazy Qorabaıdyń aıtýynsha, óziniń jeke qorynda 7000-ǵa tarta kitap bar eken. Sóıtip semeılik oqyrman qaýymǵa 1000 kitapty syıǵa tartýdy sheshken. Jastardy kitap oqýǵa baýlý, rýhanı jáne patrıottyq tárbıe berý maqsatynda uıymdastyrylǵan shara sońynda Abaı atyndaǵy kitaphana dırektorynyń orynbasary Gúlmıra Aıazbaeva aıtýly jobaǵa aq jol tilep, Serikqazy Qorabaıǵa Alǵys hat tapsyryp, óz attarynan Abaı eli týraly jazylǵan kitapty syıǵa tartty.
Raýshan NUǴMANBEK,
«Egemen Qazaqstan»
SEMEI
