Kúdiktilerdi quryqtaǵan qyz
Beısenbi, 8 naýryz 2012 8:37
Aqtóbe oblysynyń IID Esirtki bıznesine qarsy kúres basqarmasynyń qyzmetkeri, polısııa kapıtany Janat Taıshekenovadan jumysynyń qıyndyǵy men qyzyǵy jaıly aıtyp berýin suraǵanbyz.
– Siz nelikten ishki ister organynda qyzmet etkińiz keldi?
Beısenbi, 8 naýryz 2012 8:37
Aqtóbe oblysynyń IID Esirtki bıznesine qarsy kúres basqarmasynyń qyzmetkeri, polısııa kapıtany Janat Taıshekenovadan jumysynyń qıyndyǵy men qyzyǵy jaıly aıtyp berýin suraǵanbyz.
– Siz nelikten ishki ister organynda qyzmet etkińiz keldi?
– Maǵan qym-qýyt tirshilikke toly tártip saqshysynyń qyzmeti unaıdy. Ári óz otanyma, elime, jurtyma kómegim tısin degen nıetpen qolymnan kelgeninshe ishki ister salasynda eńbek etýdemin.
– Osy salada júrgen soń qylmyskerlermen betpe-bet kelgen sátter bolǵan shyǵar?
– Biz, ıaǵnı qyzdar, kóbine qylmyskerler quryqtalǵannan keıin, eger kúdikti áıel bolǵan jaǵdaıda tekserý jumystaryn jasaýǵa baramyz. Biraq 2006 jyly bir qyzyq jaıt oryn aldy. Birde keshqurym jumystan kesh shyǵyp, úıge kele jatqanmyn. Kenetten tý syrtymnan bireýdiń kele jatqan dybysy estildi. Men qorǵaný úshin sómkemnen uıaly telefonymdy alyp, qońyraý shalmaq bolǵanmyn. Sol sátte basyma jáne arqama aýyr eki soqqy tıdi. Qolymdaǵy telefon jerge túsken kezde bir jigit sómkeme jabysyp, ekinshisi telefonymdy alyp qasha jóneldi. Men esimdi jıyp, kúdiktilerdiń sońyna tústim. Sońdarynan qalmaı qýyp jetip, sómkem men telefonymdy qaıtarýdy talap ettim. Tipti bir jigitpen jaǵalasyp júrip, sambo kúresiniń ádisimen ony jerge qulatyp, qolyndaǵy uıaly telefonymnan 112 nómerine habarlasyp, polısııa shaqyrdym. Al ekinshi jigit qashyp ketti. Birer mınýttan keıin patrýldik polısııa qyzmetkerleri kelip, kúdiktini bólimge alyp ketti. Keıin ekinshi jigit te qolǵa tústi. Men erteńine jumysqa kelsem, áriptesterim meniń túndegi is-áreketimdi áńgime etip kúlip júr. Menińshe, kez kelgen tártip saqshysy osylaı jasar edi dep oılaımyn.
– Kúdiktini tyrp etkizbegenińizge qaraǵanda sporttan habaryńyz bar sııaqty?
– Mektepte júrgende voleıbol, basketbol, karate, sambo kúresimen áýestengenim ras. Sol ádis-tásilder qazir maǵan paıdasyn tıgizip jatyr. Ári ishki ister salasynda júrgen soń sporttan da alshaq bolý múmkin emes.
– Esirtkige qarsy kúres basqarmasynda qyzmet etkendikten kúdiktilerdi tekserý kezinde qyzyq jaıttar bolyp turatyn shyǵar?
– Birde bizdiń basqarmaǵa kelip túsken jedel aqparat boıynsha 20 jastaǵy qyzdy tekserdik. Kúdikti qyz bala bolǵandyqtan jedel ýákilder meniń jumys jasaýyma nıetti boldy. Biraq izdegen esirtki zattary tabylmady. Alaıda qyzdyń aıaq kıimine qaraı beretinin ańǵardym. Aıaq kıimin tekserý barysynda ultaraǵynyń astynan 2 gramm geroın tárkilendi. Oblys ortalyǵyndaǵy Turǵyndar qalashyǵynda 50 jastan asqan áıeldiń qylmysyn áshkereleýge qatystym. Álgi ákki áıel esirtki satýǵa óziniń kámeletke tolmaǵan qyzyn jumsaıtyn bolypty. Aldyn ala tergeý barysynda kúdikti áıeldiń ózi de esirtki qoldanatyny anyqtaldy. 50 jastaǵy áıeldiń esirtki satatyndyǵyn dáleldep, isti sotqa joldaǵan ýaqytta nashaqor azamatsha aýrýdan qaıtys boldy. Medısınalyq saraptama nátıjesi áıeldiń esirtkini shamadan tys kóp mólsherde qoldaný saldarynan kóz jumǵandyǵyn dáleldedi.
Mádı QÝANYShULY.
Aqtóbe oblysy.
