***
Kól kórdim men tostaǵandaı kózińnen,
Batyp kettim, tildese almaı ózińmen.
Aq jal tolqyn jaǵaǵa atyp oınaıdy,
Beıis baqtyń samaly esip sózińnen.
Qyr jaıqalyp jupar shashqan demińnen,
Bar tirshilik qulpyrady emińnen.
Saǵan yntyq bolmas edim, men ras,
Jaralǵanda teńińmen.
Tún jylaıdy, sen uıqyńnan oıansań,
Kún muńaıar ádemi bop boıansań.
Armanym joq, seniń sulý beıneńe,
Jyrdan músin qoıa alsam!
Biraq ol da asyra almas baǵańdy,
Áziz kórkiń jaryq qylǵan qarańdy.
Seniń minsiz sulýlyǵyń nur shashyp,
Jer betine shýaq bolyp taraldy.
Kúıki tirlik qajytqanda ezgilep,
Seni oılasam, sanamnan muń bezdi kep.
Tirshilikke ińkár qylyp qoıatyn,
Aıaýly jan saǵynamyn seni kóp.
Tún meniń — jubanyshym
Tún meni túrtkileıdi,
Tunshyǵyp qalatyndaı.
Aq bulttar kúrkireıdi,
Taǵy da jaýatyndaı.
Tars jumyp, kózimdi ashsam,
Túnekten oralamyn.
Tas túıin sózimdi aıtsam,
Kebinge oranamyn.
Nesine qymsynamyn,
Tún meniń jubanyshym.
Qol sozyp umsynamyn,
Qylpyldap turady ishim.
Kórinbes kózge tunyq,
Bar onda ǵajaıyp bir.
Qunyqsań túnge qunyq,
Yqylas azaıyp tur.
Tún degen qara kisi,
Qara atyn qamshylaıdy.
Aqsha bult jylamsyrap,
Kóz jasy tamshylaıdy.
Moıyndaý
Tún túnekke aınalyp,
Qalǵyp ketti juldyzdar.
Aı bulttarǵa baılanyp,
Údeı soqty túngi yzǵar.
Jer jiginen qozǵalyp,
Shyr aınaldy urshyqtaı.
Til ushynda sóz qalyp,
Nıet ettim tunshyqpaı.
Aspan tynys, taryltyp,
Alasaryp ketkendeı.
Biraq muńnan aryltyp,
Bir kógershin jetkendeı
Túnnen surap kórimdik,
Jettik mine, jaryqqa.
Qap-qara bop kórindik,
Biraq nege halyqqa.
Onyń syry moıyndaý,
Aqqa kúıe juqqanyn.
Qara túnde muńaıyp,
Jalǵyz qalam, uqqanym...
Sary qyz – sary kúz
Sary qyz keldi aýylǵa jyldaǵydaı,
Kóńilim sol baıaǵy qyrdaǵydaı.
Byltyrǵy aıaqtalmaı qalǵan syrdyń,
Qyzyǵy ertegi, ańyz, jyrdaǵydaı.
О́zgerip ketpes dúnıe ózdiginen,
Deregin taptym ómir sózdiginen.
Ájemniń aq jaýlyǵyn kelini alyp,
Atamnyń aǵash jondym kezdigimen.
Qas-qaǵym ótti bári qabattasyp,
Ákkilik ańǵaldyqpen qanattasyp.
Sary qyz jasyma jas qosyp berdi,
Ádemi ázilimiz sabaqtasyp.
Kórmegen kóńil shirkin kúdiktenip,
Sondyqtan júrem ylǵı úmittenip.
Sary qyz aqylyma aqyl qosty,
Baısaldy minezimen kúlip kelip.
Sezedi júrek muńǵa baılanǵanyn,
Eske alyp qyzdy aýylǵa saılanǵanyn.
Bilsem de, bilmegen bop júrem endi,
Sary qyz – sary kúzge aınalǵanyn...
***
Kúnádan pák sulýlyǵyń kózdi arbap,
Qııal-qusym álemińdi júr barlap.
Kóńilimniń baqshasyna qonsań ǵoı,
Jan terbeter, qudiretti sózdi arnap.
O, perızat!
Bulbul úndi gúlzarym,
Mahabbattyń arqalatqan muń-zaryn.
Mártpin, biraq, shaharym joq syılaıtyn,
Al, Hafızdeı túsine alam qyz janyn.
Gúl men qaıyń saǵan teńeý bola almas,
О́ıtkeni olar semse qaıtyp ońalmas.
Táńir seni qyzǵanysh qyp jaratty,
Ǵashyq jannyń júreginen joǵalmas.
Tyńda meni, aılaly ómir túlkideı,
Qyryn qarap, jıyrylǵansha kirpideı.
Qas sulýlyq bolmasa eger jalǵanda,
Izgilik te, estiler ed túrpideı...
Kún men Aıdaı daralanǵan bóleksiń,
Zerttelmegen, jupary mol túbeksiń.
Jan balasy kórgen zamat tańdanyp,
Keýdelerde dúrsildegen júreksiń.
Kóńil shýlap,
Jel julqyǵan emendeı,
Áppaq ómir báıek bop júr enemdeı.
Terezemnen syǵalaıdy qońyr kesh,
Bólmeme sen jaryq bolyp enerdeı.
***
Til baılanǵan kórkińe ishteı súıinip,
Sámbi taldaı tursyń ásem ıilip.
Janaryńa mynaý jalǵan bes kúnniń,
Muń-shattyǵyn qoıǵandaısyń ıirip.
Teńiz syndy gaýhar jatqan túbinde,
Kózińe únsiz qaraı berem, túńilme.
Maýjyraǵan dúnıeni kórkińmen,
Uıqysynan oıattyń sen búgin de.
Sulýlyqtyń túp-tórkini jaralǵan,
Keldiń be sen bizge jumbaq araldan.
Ardaı áppaq júregińde jatqandaı,
Tazalyqtyń básiresi joǵalǵan.
Kúıiksiń sen,
Ári shattyq shalqyǵan,
Sulýlyǵyń júrekterdi sharpyǵan.
Meniń júıirik qııal qusym qalyqtap,
Seniń móldir álemińde qalqyǵan.
Sorly júrek sorǵa bola súıesiń,
Ot janardyń jalynyna kúıesiń.
Seni kórip júregime jerlegem,
Mahabbattyń máńgi ólmeıtin kıesin.
Kórgen jandar ah urady tesilip,
Bóten oılar ishterinde esirip...
Teńdesi joq sulýlyqty keı sátte,
Ardyń ózi baǵalaıdy keshigip.
