Bul kezekten tys ótkeli otyrǵan prezıdenttik saılaýdyń tarıhı maǵynasy osy turǵydan úlken mánge ıe. Atalǵan tarıhı oqıǵanyń salmaǵyn aldaǵy ýaqytta saılaýǵa túsetin úmitkerler, tipti arttyra túsedi. Qudaıǵa shúkir, qazaq elinde prezıdent bolýǵa laıyqty azamattar jetkilikti, olardyń barlyǵy el basqarýǵa nıet bildirýi tıis. Solardyń ishinen halyq óziniń qalaýlysyn qapysyz tańdaıdy dep senemin. Prezıdentimiz Qasym-Jomart Toqaev ózi atap ótkendeı, bul saılaýdy ádil ótkizýge jaýapkershilik alatynyn jetkizdi. Bul sózdi Memleket basshysy jaıdan-jaı aıtyp otyrǵan joq.
Q.Toqaev prezıdenttik saılaý ótkizýde úlken tájirıbesi bar turaqty tulǵa. Mınıstr minberinde bolsyn, Memlekettik hatshy mindetin atqarǵan tusta, syrtqy saıasat sahnasynda júrgizgen salıqaly saıasaty bul Memleket basshysynyń zor tájirıbesin aıǵaqtaıdy. Prezıdent qazaq halqyn jaqsy biledi, sáıkesinshe Qasym-Jomart Kemelulyn da buqara jaqyn tanıdy. Ol kisiniń saılaý ádil ótedi degen sózi bizdi nyq qadamdarǵa jetelep áketti. Saılaýdyń taza ótýi – kóp jaıttardyń, sonyń ishinde musylmandyq jolymyzdyń durys ekenin bildiredi. Taza degen sóz – ádilettilik degen qaǵıdanyń týra balamasy. Bul ádildik joly barlyǵymyzdy marqaıtatyn sheshim.
Biz osy eki aıdyń ózinde ult retinde edáýir ósemiz. Qazir qoǵam qozǵalysqa keldi, ártúrli oılar men alýan pikirlerdiń de ashyq talqylanǵany zańdy. Alaıda bizdiń halyq – sharasynan shyqpaıtyn, sabasynan syrtqa tógilmeıtin halyq. О́zen qalaı óz arnasymen aqsa, bizdiń qoǵamnyń minezi de sondaı. Biz el úshin, bolashaq úshin óz arnamyzben júremiz. Saılaý da óz arnasymen ótetinine kámil senemin.
Ǵarıfolla ESIM,
UǴA akademıgi
