Shyn júırikter shyǵandap shyqty

Seısenbi, 26 maýsym 2012 7:27

Eýropa chempıonatynda ótken aptanyń sońǵy úsh kúninde shırek fınaldyń qalǵan úsh oıyny oınalyp, jartylaı fınaldyq tórttiktiń uzyn-yrǵasy túgendeldi. Osy aralyqta ádepki Portýgalııanyń qataryna Germanııa, Ispanııa jáne Italııa quramalary kelip qosyldy. Jankúıer qaýym týrnırdegi shyn júırikterdiń kimder ekenin endi tolyq bildi.

Seısenbi, 26 maýsym 2012 7:27

Eýropa chempıonatynda ótken aptanyń sońǵy úsh kúninde shırek fınaldyń qalǵan úsh oıyny oınalyp, jartylaı fınaldyq tórttiktiń uzyn-yrǵasy túgendeldi. Osy aralyqta ádepki Portýgalııanyń qataryna Germanııa, Ispanııa jáne Italııa quramalary kelip qosyldy. Jankúıer qaýym týrnırdegi shyn júırikterdiń kimder ekenin endi tolyq bildi.

Germanııa-Grekııa – 4:2. Bul match­ta «nemis máshınesiniń» me­reıi ústem bolatynyna jurttyń kóbi shúbálanǵan joq. Gáp tek oıynnyń qandaı eseppen aıaq­talatynynda ǵana boldy. Aıtatyny joq, Ioahım Levtiń shá­kirtteri týrnır bastalǵaly bar­lyq quramalardyń arasynda eń táýir oıyn kórsetip keldi. Al grekterdiń pleı-offqa shy­ǵýy­nyń ózi olar úshin zor tabys.

Matchtyń alǵashqy mınýty­nan-aq onyń qandaı arnada ór­bı­tini belgili boldy. Dopty bir­den ba­ýyrynyń astyna qaraı tartyp alǵan «býndestım» Mıhalıs Sıfakıstiń qaqpasyn jan-jaq­tan qyspaqqa alýǵa kirisip ketti. Bul tustary starttyq qu­ramda kútpegen jerden kóringen Marko Roıs, Mıroslav Kloze, Andre Shıýrrle úlken belsen­di­lik tanytty. Bulardyń birin­shisi tipti matchtyń eń úzdik oıynshysy da atandy. Sol Markoda úzi­liske deı­in keminde úsh ret gol soǵý múmkindigi boldy. Al osy­lar­dyń báriniń óteýi syndy et­ip, komanda kapıtany Fılıpp Lam­nyń «toǵyzdyqqa» gol salýy keremet ádemi kórinis ákeldi.

Ekinshi taımda grekter sırek te bolsa shyqqan qarsy shabýyldaryn barynsha tıimdi paıdalanyp qalýǵa tyrysyp baqty. Bul maqsat kóp uzamaı júzege de asty. Quıyndaı uıytqyǵan sondaı shabýyldardyń birinde Gıorgos Samaras qaqpa aldyndaǵy azdaǵan abyr-sabyrdy tamasha paıdalanyp ketti. Alaıda, «Ellada jurty juraǵattaryna» bul tepe-teńdik jaǵdaıdy uzaq us­tap turýdyń oraıy kelmedi. Bar bolǵany bes mınýttan keıin Samı Hedıra óz komandasynyń orasan zor basymdyǵyn taǵy bir golmen aıshyqtap berdi. Bu­dan ári bir jaqty soqqylaý bas­taldy. Sonyń nátıjesinde chem­pıonat bastalǵaly Mıroslav Kloze matchtaǵy jeńimpaz­dyń kim bolatynyn birjola sheship qoıdy. Taǵy birshama mezgilden soń Marko Roıs nemister salǵan goldar sanyn tórteýge jetkizdi. Kezdesý osymen bitýge qaraǵan shaqta grekter jasaǵan sońǵy qarsy shabýyl kezinde germanııa­lyqtar qorǵaýshysy óz aıyp alańynda dopty ustaı aldy. Penaltı. Ony bul joly grekter qur jibermedi.

Ispanııa-Fransııa – 2:0. Match­­tyń basynda bul qura­ma­lardyń osyǵan deıingi resmı kezdesý­leriniń bárinde fran­sýz­dardyń desi basym bolyp kel­geni talaı aıtyldy. Osy statıstıka eki jaqqa da aıtarlyqtaı áser etti. Fransýzdar úshin sol dástúr saqtalyp qalatyndaı kórinse, ıspandarǵa bul seńniń kóbesin sógý basynan joǵary sekirýmen birdeı bolyp sezildi. Bul eki jaqty da shamadan tys tolqy­typ jiberdi.

О́zderiniń mystary basyp turǵanyn sezgen Loran Blan oıyn bastalǵannan muqııat qorǵa­nys sátindegi joǵary pressıng pen jyldam jaýap qaıtarýǵa kóbirek kóńil bóldi. Al ıspandar oıyn tizginin birden qolǵa alǵannan artyq aılanyń joq ekenin tez uqty. Fransýzdar kópke deıin qorǵanys jaǵyna yjdaǵatty bolǵanymen, jyldam jaýap jaǵyn onshama kók­tete qoımady. Munyń esesine, ıspandar barǵan saıyn óz-ózderine degen senimge tereńirek uıyp, joıqyn joryqty jıile­týge kóshti. Munyń aqyry qarsy qaqpany alýǵa da jetkizdi. Qorǵaýshy Mate Debıýshı ishke qaraı jaryp ótken shabýylshy Jordı Albadan kóz jazyp qaldy. Al anaý 11 metrlikke ja­qyndasymen dopty Habı Alo­n­soǵa dál berdi. Qaqpashymen betpe-bet kelgen forvard muny múlt jibermedi. Jiberilip qoı­ǵan osy gol Blannyń barlyq josparlaryn tas-talqan etti. Onyń komandasy budan keıin qarsylastardyń birinen soń biri tolqyndanyp kelip qalǵan shabýyldaryn úzdiksiz qaıtarýmen boldy. Biraq ózderi ilgeri qaraı bara almady. Úzilisten keıin ıspandar qysymdy kúsheıtpese, báseńsitken joq. Munyń nátı­je­si matchtyń eń sońynda kórin­di. Kezekti joryqtary kezinde ıspandardy ruqsat etilmegen tásilmen toqtatqan fransýzdar qaqpasyna 11 metrlik aıyp doby belgilendi. Ony taǵy da Alonso túsirdi.

Anglııa-Italııa – 0:0, penaltı – 2:4. Kópshilik kútkendegideı, oıyn óte tartysty da qyzyqty ótti. Biraq komandalar matchtyń negizgi ýaqytynda da, qosymsha mezgilinde de esep asha almaı tarqasty. Degenmen, búkil kezdesý boıyna kórermenin elikti­rip otyrdy. Shaıqas birden qyzý bastaldy. Onyń alǵashqy sátin­de-aq ıtalıandar gol soǵyp kete jazdady. Shamalydan soń osyndaı múmkindikti aǵylshyndar jiberip aldy. Birshamadan keıin oıyn sabyrly aǵysqa tústi. Bul ıtalıandarǵa maıdaı jaqty. Osy tusta birtindep match tizgi­nin qolǵa alyp alǵan olar sosyn aqyryna deıin qarsy­lasta­ry­na bas kótertpedi. Budan keı­in olar esep ashatyn da múm­kin­dikke de kóbirek ıek artty. Match­tyń sońǵy jıyrma mınýty so­lar­dyń bir jaqty basymdy­­ǵymen órnekteldi. Osy tur­ǵy­dan kelgende, Italııa fýtbol­shy­la­ry­nyń oıynnan keıingi pe­nal­tıde basym shyqqandary naǵyz ádi­let­tilik bolyp kóriner edi.

Kelesi kezeńge ótken tórt komanda keshe men búgin tynys aldy. Erteń – jartylaı fınal­dyń birinshi oıyny. Bul kúni Portýgalııa-Ispanııa bettesedi. Al erteń Germanııa-Italııa ara­syndaǵy myqtylar anyqtalady. Onyń arǵy jaǵynda, árıne, fınal tur.

Serik PIRNAZAR,

«Egemen Qazaqstan».

Match mınıatıýralary

* Anglııa-Italııa matchynde negizgi jáne qosymsha ýaqyt­tarda esepashylmaı, jeńimpazdy anyqtaý úshin birinshi ret oıynnan keıingipenaltıge júginýge týra keldi.

* Osy kezeńde kezdesý kezinde qaqpalarǵa eki penaltı belgilenip, ekeýide júzege asty. Olardy grek Dımıtrıs Salpıngıdıs pen ıspan HabıAlonso túsirdi.

* Osy 4 matchty tamashalaý úshin stadıondarǵa 205 680 adam jınaldy. Albirinshiliktiń basynan beri sport arenalaryna 1 330 134 kórermen keldi.

* Portýgalııa-Chehııa matchynda portýgaldyq Krıshtıaný Ronaldý taǵy birdop salyp, goldarynyń sanyn 3-ke jet­kizdi. Tap osynshama gol qazirMarıo Gomes (Germanııa), Alan Dzagoev (Reseı), Marıo Madjýkıch(Horvatııa) sekildi oıynshylardyń enshilerinde de bar. Al ıspan HabıAlonso dýbl jasaǵan oıynshylardyń qataryna qosyldy.

* Tóreshi bul matchtarda fýtbolshylarǵa 11 ret eskertý berdi. Osy joly grek Sokrates Papastopýlos úshinshi márte eskertý aldy. Onyń Polshamen maýsymashar oıynda alynǵan ekinshisi fýtbolshyny alańnan qýýǵa sebep bolyp edi.

* Osy kezge deıin oıynshylarǵa 107 ret «sary qaǵaz» kórsetildi.

* Úzdik oıynshy ataǵyna Krıshtıaný Ronaldý (Portýgalııa), Mark Roıs (Germanııa), Habı Alonso (Ispanııa), Andrea Pırlo (Italııa) ıe boldy.

_________________________

Oılar, pikirler, kózqarastar

Mıhaıl GERShKOVICh, KSRO quramasynyń burynǵy oıynshysy: – Men baıaǵydan bizdiń quramany óz mamandarymyzdyń basqarǵanyn qalaýshy edim. Endi budan basqa jol qalmady. Ondaı maman da bar bizde. Ol – Valerıı Gazzaev. Bul otandasymyz qazir jattyqtyrýshy retinde de ósip jetildi. О́zi biraz dem alyp ta aldy. Demek, tyń kúshpen kirisýi kerek.

Roberto MARTINES, Anglııanyń «Ýıgan» klýbynyń bas jattyqtyrýshysy: – Meni Portýgalııanyń oıyny shyndap tań qaldyrdy. Osy rette Paolý Bıntý qandaı da bir maqtaýǵa laıyq. Ol jeńiske jetetin quramanyń pishinin jaqsy jasapty. Sol jolda Krıshtıaný Ronaldýdy kerekti jerine óte tamasha paıdalanyp otyr.

Raımon DOMENEK, Fransııa quramasynyń burynǵy bas jattyqtyrýshysy: – Men fransýz fýtbolynan túńilip kettim. Ásirese, onyń sońǵy eki matchynan qatty kóńilim qaldy. Bizdiń quramada naǵyz lıder joq. Benzema jeke oınaýǵa qumar. Munyń bári jattyqtyrýshynyń yqpaly bolmaǵanynan oryn alyp otyr.