Sóz saıysyna Qazaqstannan segiz aqyn qatysqan. Semeıdiń eren júırigi Farhat Muratuly, Kerekýdiń kelisti aqyndary Ańsaǵan Zaryquly men Aıshýaq Qalamııauly. О́ńkeı kókiregin kórkem jyrdyń kerýeni kergen, bolashaǵynan úmit kúttiretin jas aqyndar. Jyr dodasyna barlyǵy 29 aqyn qatysypty. Altaıdyń Qosaǵashynan da kórkem sózdiń kórigin qyzdyrǵaly jetkender bar. Al, ata murasyn saǵynǵan tyńdaýshy qaýymda tipti esep joq. Úsh kúnge sozylǵan, mońǵol eliniń aspanyn qazaqtyń kórkem jyrymen kómkergen aıtysta aldymen ózderiniń respýblıkalyq sóz saıysy ótkizilipti. Sodan soń halyqaralyq aıtys.
–Halyqaralyq aıtystyń bir ereksheligi, shynaıylylyǵy boldy,–deıdi Qurmet Quralhan,–keıbir aıtystaǵydaı qarsylasyń kúni buryn belgili bolyp, aldyn-ala daıyndalý joq. Sondyqtan jattandylyqtan ada, sýyrypsalma ónerdiń jarqyn mysalyn jarqyratyp kórsetýge múmkindik týdy. Sóz lámin baǵalaýlary da qyzyq. Jalǵyz qazylar alqasy emes, muqııat tyńdap, meılinshe túısinip otyrǵan óner súıgen qaýymnyń da kózqarasy esepke enedi eken.
Aıtysker aqyndardyń aýzynan shyqqan sóz ajaryn jaza baspaı tanıtyn qazylar alqasy men sóz qadirin biletin qalyń kórermen biraýyzdan kókshetaýlyq Qurmet aqyndy dara dep tanyǵan. Arshaly aýdanynyń Bulaqsaı aýylynda mádenıet úıiniń meńgerýshisi bolyp qyzmet isteıtin jerles aqynnyń jetistigin jalǵyz aqynǵa ǵana emes, máıekti sózdiń mánin saqtap qalǵan elge degen yqylas dep túısindik.
Halyqaralyq aıtysta Qobda ákimshiligi uıymdastyrǵan. Shólirkegen dalaǵa aq jaýyn bolyp meıirin qandyrǵandaı tula boıyndaǵy tamasha talanttarymen halqyna qyzmet kórsetken aıtyskerlerdi alqalaǵan alǵys-qurmette shek joq desedi. Shalǵaıdaǵy qandastarymyzdyń ult murasyna degen yqylasy Qazaqstannan barǵan aqyndardyń kókiregin qolamtanyń shoǵyndaı áli qyzdyryp júr.
