Qazaqstan halqy oblystyq assambleıa, etnomádenı birlestikter, ardagerler, jas býyn ókilderi, «Aıbyn» áskerı-patrıottyq klýb jáne «Jas sarbaz» aımaqtyq shtab músheleri qatysqan kezdesýde túrli is-sharalar aıasynda jer-jerlerde keń óris alǵan jastar jylynyń mańyzdylyǵy atap ótildi.
Kýrdtardyń «Barbang» mádenı uıymynyń oblystyq tóraǵasy Rashıd Nadırov jastar jyly aıasynda atqarylatyn negizgi mindetterdi Elbasy belgilep bergenin, bul oraıda basty basymdyqtar retinde jumyspen, baspanamen qamtý sekildi áleýmettik máselelerdi sheshý, sondaı-aq túrli memlekettik baǵdarlamalarǵa belsene atsalysý, taǵy basqa tapsyrmalar júktelgenin jetkizdi. О́skeleń urpaq úshin memleket tarapynan jan-jaqty qamqorlyq jasalyp keledi. «Dıplommen–aýylǵa!», «Bıznestiń jol kartasy», «Jumyspen qamtý-2020», «Árbir otbasyna «7-20-25» baǵdarlamalarynda birtalaı jeńildikter qarastyrylǵan. Munyń ózi jastarymyzdyń boıynda alǵa umtylýshylyq talpynysymen tabandylyǵyn týdyrady. Iskerlik, izdenimpazdyq maqsatkerlik qasıetterin oıatady. Meni el erteńi, bolashaǵy–jastardyń bilimge, eńbekke degen erekshe ynta-jigeri, romantıkalyq izdeniske toly jańashyldyqtary qýantady, dedi Rashıd Sadyquly.
Jınalǵandar M. Qozybaev atyndaǵy Soltústik Qazaqstan memlekettik ýıversıtetiniń oqytýshysy, aýyl sharýashylyq ǵylymdarynyń kandıdaty Kúlbaram Baıazıtovanyń sózin úlken tebirenispen tyńdady. «Qazaqstannyń 100 jańa esimi» jobasynan oıyp turyp oryn alǵan izdenimpaz ǵalymnyń aıtary mol. Onyń aldynan júzdegen shákirt qanattanyp ushyp, ár salada jemisti eńbek etip júr. «Motıvasııa» sán úshin aıtylatyn jalań sóz emes. Ár áreketimiz, nıetimiz alǵy maqsat-múddelermen ushtasyp, sóz ben istiń birligin saqtap, senim údesinen kórine bilsek, elimiz damıdy, órkendeıdi, deı kelip, belsendi jastarǵa úlken úmit artatynyn, sonymen qatar jigersiz, bosbelbeý sanattaǵylar qatary áli de az emestigin, olardy qatarǵa tartý, tárbıeleý, jan-dúnıesinde eldik, otanshyldyq uǵymdaryn qalyptastyrý úshin tárbıe, nasıhat jumystaryn báseńdetpeýdi kóldeneń tartty.
Sanaly ǵumyryn ishki ister qyzmeti salasyna arnaǵan Chıngız Kýrbanov qıyndyqtardy, álsizdikti, osaldyqty shydamdylyqpen jeńe bilý tájirıbesimen, salamatty ómir súrý joldarymen bólisti. SQMÝ janyndaǵy stýdentter rektory Aınur Ábiltaeva ozyq ıdeıalar men ómirsheń jobalar qashanda qoldaý tabatynyn, bul oraıda múmkindigi shekteýli jastardyń izdenisteri úlken qyzyǵýshylyq týdyryp otyrǵanyn áńgimeledi.
Qoǵamdaǵy jańǵyrý úderisteri eshkimdi beı-jaı qaldyrmaýy tıis. Igi bastamalardyń aldyńǵy leginde jastardyń júrýi zańdy. Olardy qoldaý memlekettik saıasattyń basty býynyna aınalǵany sondyqtan. О́skeleń urpaq baǵyndyratyn belester áli alda, desti óz oılaryn ortaǵa salǵan ózge de sheshender.
