Atalǵan aksııa mamyrdyń sońyna deıin Qazaqstannyń barlyq óńirindegi dárihanalar men medısınalyq mekemelerde ótedi. Shara sheńberinde DZUSO sarapshylary DSM-men birlesip, dárilerdiń nege tek resept boıynsha beriletinin, preparatty resepti kórsetkende ǵana satýdyń mańyzdylyǵy týraly, ózin-ózi emdeýdiń zııany jaıynda, sonymen qatar, qazaqstandyqtardyń dárini qoldanǵannan keıin jaǵymsyz reaksııalar týyndaǵanda qaıda habarlasýǵa bolatynyn túsindiredi.
Sondaı-aq, DZUSO mamandary medısınalyq qaýymdastyqtyń ókili jáne halyqpen kezdesedi. DZUSO sarapshylary áleýmettik jelilerdegi paraqshalar arqyly tikeleı efırge shyǵyp, emdelýshilerdiń suraqtaryna jaýap beredi.
Qazaqstandaǵy dárilik preparattardyń jaǵymsyz áseri týraly málimetter DZUSO Farmakologııalyq qadaǵalaý jáne dárilik zattardyń jaǵymsyz áserlerin monıtorıngteý ortalyǵynda óńdeledi. DZUSO paıdasy men qaýipke qatysty júıeli taldaý jasaıdy (pasıentterdiń osy nemese basqa preparatty qoldaný qajettiligin baǵalaıdy). 2019 jyly qańtardan bastap DZUSO atyna dárilerdiń keri áseri týraly 500-den astam karta-habarlama tústi. Bul 2018 jyldyń osy kezeńimen salystyrǵanda 12% az.
- Pasıentter emdeýshi dárigermen birge karta-habarlamany (sary kartany) toltyryp, www.ndda.kz veb-saıty arqyly dári-dármektiń jaǵymsyz reaksııasy týraly habarlaýǵa bolady. Bizdiń sarapshylarymyz árbir ótinish-hatty jeke qaraıdy. Preparattardyń jaǵymsyz áserin azaıtý úshin, biz qazaqstandyqtardy dári-dármekti qatań dárigerdiń reseptisi arqyly qabyldaýǵa shaqyramyz, - dedi DZUSO Bas dırektorynyń mindetin atqarýshy Arnur Nurtaev.
Qazaqstanda 10 jyldan beri farmakologııalyq qadaǵalaý jumysy júrgiziledi. 2008 jyldan bastap Qazaqstan Respýblıkasy dárilik preparattardyń jaǵymsyz áserlerin monıtorıngteý jónindegi DDSU (Ýppsala q., Shvesııa) jahandyq baǵdarlamasynyń tolyq quqyqty múshesi jáne elimiz boıynsha derekterdi osy uıymǵa joldaıdy.
