Osymen jetinshi ret uıymdastyrylǵan aıtýly dodaǵa saıdyń tasyndaı iriktelgen 30 boz kilem sheberleri qatysyp, 90 keli jáne odan joǵary salmaq dárejesi boıynsha ózara kúsh synasty.
Aqqaıyń aýdanynyń úkilep qosqan úmiti Almat Qonaqbaev qarsylasyn taza jeńdi.Taıynshalyq Rýstam Jumaev ta ekinshi aınalymǵa esh qıyndyqsyz ótti. Ol–tájirıbeli balýan, kezinde «Qyzyljar barysy» ataǵyn jeńip alǵan.
Dese de, «kúsh atasyn tanymaıdy». Bul joly «Qyzyljar arlandary» sport klýbynyń múshesi, qazaq kúresinen álem chempıonatynyń eki dúrkin chempıony, «Qazaqstan barysy-2014» respýblıkalyq týrnıriniń altyn belbeý ıegeri Muhıt Tursynovtyń baǵy jandy. Oǵan altyn beldik pen 500 myń teńge kóleminde aqshalaı syılyqty aımaq basshysy Qumar Aqsaqalov tabystady.
Ekinshi orynǵa petropavldyq Ernar Begaıdarov kóterilip, 300 myń teńgeni ıelendi. Úzdik úshtikti Ýálıhanov aýdanynyń oǵlany Altynbek Aýsaǵıtov túıindedi.
Nur-Sultan qalasynda ótetin respýblıkalyq «Qazaqstan barysy» jarysynda oblys namysyn Muhıt Tursynov pen Ernar Begaıdarov qorǵaıtyn bolady.
Soltústik Qazaqstan oblysy
