ÝNIVERSIADA

Ol qysqy Azııa oıyndaryna ázirliktiń  qandaı deńgeıde ekenin kórsetti Qysqy sport túrlerinen kenjelep qal­ǵanymyzdy kúni keshe Vankýverde ótken aq Olımpıada oıyndary taıǵa tańba basqandaı aıqyndap berdi. Ataqty shańǵyshy V.Smır­novtyń budan burynǵy olımpıadalardaǵy bir altyn, eki kúmis, bir qolasy men konkıshi L. Prokashevanyń bir qolasyna Kanadadaǵy dúbirli jarysta ǵaıyptan E. Hrýstalevanyń jeńip alǵan bir kúmisin qosqanda komandalyq jalpy esepte 26-shy orynda tur ekenbiz. Alda – Sochı Olımpıadasy. Onyń aldynda Almaty men Astanada jalaýyn kóteretin VII qysqy Azııa oıyndary ótpek. Oǵan nebári 11 aı qalypty. Az ýaqytta ne tyndyramyz? Jaqynda Kendi Altaıda elimizdegi joǵary oqý oryndary arasynda III qysqy ýnıversıada  bolyp ótti. Ol on kúnge sozylyp, elimizdiń otyzdan astam joǵary oqý oryndarynan kelgen stýdentter shańǵy, bıatlon, shaıbaly hokkeı, shaǵyn fýtbol, qysqy sporttyq baǵdarlaý, gir sporty, qysqy prezıdenttik kópsaıys, armrestlıng, paýerlıftıng sııaqty sporttyń 16 túri boıynsha medaldardy sarapqa saldy. Ýnıversıadanyń saltanatty ashylýy Rıdder qalasynda ótti. Bul jolǵy ýnıver­sıa­danyń ereksheligi, barlyq joǵary oqý oryndarynyń sańlaqtary bir jerge toptalyp, óner kórsetti. Oblys ákiminiń orynbasary Túsiphan Túsipbekov sportshylar aldynda sóılegen sózinde:  “Ýnıversıada – Olım­pıa­­dalyq rezerv úshin jańa talanttardyń esim­derin anyqtaýdyń tamasha múmkindigi. Rıd­derdiń talantty ul-qyzdary A.Poltoranın, S.Cherepanov, S.Malahova-Shıshkına, Iý.Ro­dıo­nova, Iа.Savıskıı, taǵy basqalar Van­kýverde namysty qoldan bergen joq. Eger oqysta qulap qalmaǵanda Alekseı Poltoranın kem degende bir qolany alatyn edi. Nesi bar, Sochıde jerlesterimiz jerge qaratpaıdy degen oıdamyz”, dese, S.Amanjolov atyndaǵy Shyǵys Qazaqstan memlekettik ýnıversıtetiniń rektory, fılologııa ǵylymdarynyń doktory, professor Beıbit Mamraev óz baıandamasynda bul jolǵy qysqy ýnıversıadanyń jeńim­pazdary Qazaqstannyń namysyn alǵash ret TMD aýmaǵynda – Astana men Almatyda ótetin 2011 jylǵy Azııa oıyndarynda qorǵaıtynyn tilge tıek etti. Hosh, sonymen sporttyń 16 túri boıynsha medaldardy sarapqa salý Rıdder men О́ske­menniń sport saraılarynda dúbirlep ótti. Shaı­baly hokkeıde Shyǵys Qazaqstan mem­lekettik ýnıversıteti 12 upaımen top jardy. Shyǵys Qazaqstan memlekettik tehnıkalyq ýnıversıteti – ekinshi, al Qazaq-amerıkan erkin ýnıversıteti  úshinshi oryndardy bólisti. Fýtzalda da professor B. Mamraev jetekshilik etetin ýnı­ver­sıtet aldaryna jan salmady. Fýtzaldan qyz­dar arasynda KazAST birinshi, ShQMÝ, QarMÝ  ýnıversıtetteri odan keıingi júldeli oryndarǵa taban tiredi. Paýerlıftıngte erler men áıelder arasyndaǵy jarysta ShQMTÝ  aldaryna jan salmady. Gir sportynda Soltústik Qazaqstan memlekettik ýnıversıteti top bastasa, qol kúresinde óskemendikter  aldan kórindi. Onyń jóni bar. Sebebi, atalmysh joǵary oqý ornynyń qol kúresiniń sheberlerin uzaq jyldar boıy esimi elge jaqsy tanys Satypaldy Qydyrhanov baptap keledi. Bul saıysta tórelik etken Satypaldyǵa jarysty ótkizýshiler alǵystaryn aıtty. Aıgúl Qydyrbaeva, Nazerke Eginbaeva, Aınur Qonysbaeva, Azamat Manabaev, Ernat Qızamıtdınov qol kúresinde eshkimge des bermeı altynnan alqa taqty. Rıdderdegi bıatlon jarysynda Shyǵys Qazaqstan memlekettik ýnıversıtetiniń rektory Beıbit Mamraev basqaratyn komanda (erkekter men áıelder) qarsylastarynyń barlyǵyn aıqyn basymdyqpen jeńdi. Osy oqý ornynyń túlegi Olga Poltoranına sprınt, pasıýt jáne estafetalyq jarysta úsh birdeı altyndy qor­jyn­ǵa saldy. Shańǵy jarysynda da B. Mam­ra­ev­tyń saıypqyrandary kileń birinshi oryn­dardy ıelendi. Qysqy baǵdarlamada tehnıka ǵylymdarynyń doktory Ǵalym Mútánov basqaratyn Shyǵys Qazaqstan memlekettik tehnıkalyq ýnıversıteti qyzdar jáne erkekter arasynda eshkimge des bermedi. ShQMÝ – ekinshi, soltústikqazaqstandyqtar úshinshi oryndarǵa turaqtady. Ońdasyn ELÝBAI, Shyǵys Qazaqstan oblysy.