«Elektrondyq kommersııa – bul álemdik trend, servıstik ekonomıkanyń qarqyndy damyp kele jatqan baǵyttarynyń biri», dedi A. Mamın.
Úkimet basshysy elektrondy saýdany ekonomıkanyń ósýiniń qozǵaýshy kúshteriniń biri retinde qarastyrý qajettigin atap ótti. Damyǵan ınfraqurylymdy eskerýmen, elektrondy saýda kólemin arttyrý jańa jumys oryndaryn qurýǵa múmkindik beredi. Búginde atalmysh jáne irgeles salalarda 33 myń adam jumyspen qamtylǵan. 2025 jylǵa qaraı bul kórsetkishti 314 myń adamǵa deıin jetkizý kózdelgen.
Boljamdarǵa súıensek, 2025 jylǵa qaraı qazaqstandyq ınternet alańdardaǵy satyp alý kólemi 153 mlrd teńgeden 2 trln teńgege deıin ósip, bólshek saýdanyń 25% quraıtyn bolady. Elektrondy kommersııa aıasynda logıstıkalyq kompanııalardyń tranzıtten kútiletin kirisi 2025 jylǵa qaraı 1270 mlrd teńgege deıin ósedi.
«Batys Qytaı-Batys Eýropa dáliziniń daıyn ınfraqurylymyn eskerýmen, konteınerlik tasymaldar men logıstıkanyń ósýimen qatar avtotasymaldaýshylar úshin úlken áleýeti bar baǵyt ashylady, dedi A. Mamın. - Elektrondy saýda-sattyqtyń ekonomıkaǵa tıgizetin mýltıplıkatıvti áseri jalpy ishki ónimge jyl saıyn qosymsha 1,1% deńgeıinde úles qosady dep boljaýǵa, 2025 jylǵa qaraı Qytaıdan Qazaqstan arqyly Eýropaǵa tasymaldar qarqynyn táýligine 2 myńnan 21 myńǵa deıin arttyrýǵa múmkindik beredi».
Premer-Mınıstr elektrondyq saýda arqyly otandyq aýyl sharýashylyǵy óndirisiniń jáne basqa da óńdeý ónerkásibiniń ónimderin shetelderge, onyń ishinde Qytaı naryǵyna ótkizý áleýetin atap ótti. Mysaly, aýyl sharýashylyǵy taýarlary men tamaq ónimderin elektrondy saýda-sattyq arqyly ótkizý jyl saıyn 20%-ǵa ósetin bolady.
«Qazirgi kezde álemde iri saýda jelileriniń jabylyp, olardyń elektrondy kommersııa qoımalary retinde paıdalanylýyn eskersek, aldaǵy ýaqytta logıstıkalyq ortalyqtar naryqtyń negizgi baǵytyna aınalýyna múmkin», dedi Asqar Mamın.
Osyǵan baılanysty, Úkimet basshysy 2025 jylǵa deıin elimizdiń barlyq iri qalalarynda kólik-logıstıkalyq ortalyqtardy iske qosý boıynsha jumystardy jalǵastyrýdy tapsyrdy. A. Mamın atap ótkendeı, bul jumysqa otandyq jáne sheteldik ınvestorlardy, sonyń ishinde memlekettik jekeshelik áriptestestik tetikterin qoldaný arqyly, tartý kerek. Sondaı-aq, Qorǵasta qazir jumys istep turǵan ınfraqurylymdy paıdalaný múmkindigin de qarastyrǵan jón.
Kadrlar daıyndaý máselesine jekelegen kóńil bólindi. Jumys oryndarynyń josparlanǵan ósimine sáıkes 2025 jylǵa qaraı 280 myńnan astam jumys oryndary ashylady. Úkimet basshysy «Qazposhta» AQ jáne logıstıkalyq kompanııalar kolledjder men basqa da bilim beretin mekemeler bazasynda mamandardy daıyndaýdy óz qaramaǵyna alý máselesin qarastyrýlary qajettigin atap ótti.
«Elektrondy saýda ekonomıkanyń odan ári ósýine serpin beredi. Biz tranzıttik múmkindikterdi jáne kólik-logıstıkalyq ınfraqurylymdy tıimdi paıdalana otyryp jáne otandyq naryq áleýetin ulǵaıta otyryp, onyń tutas ekojúıe retinde damýy úshin barlyq kúsh-jigerimizdi salýymyz kerek», dedi Asqar Mamın.
Máseleni qaraý qorytyndysy boıynsha Premer-Mınıstr 2025 jylǵa deıingi elektrondy kommersııany damytý jónindegi Jol kartasyn ázirleýdi tapsyrdy.
