Ǵalymdar ózderiniń sońǵy ǵylymı jańalyqtaryn tanystyrdy. Olardyń ishinde sapaly uzaq ómir súrýge arnalǵan ónimder, medısınalyq, kosmetıkalyq jáne sport ortalyqtaryndaǵy halyqtyń ómir súrý sapasyn jaqsartý jónindegi gendik testileý boıynsha qyzmetter, isik aýrýlaryn dári-dármekpen emdeý, jylyjaılar úshin dıodty jaryq shamdarynyń óndirisi, iri qara maldyń ónimdiligin arttyrýǵa arnalǵan jem qospalary men basqa da ónimder bar.
El ekonomıkasynyń basym baǵyttaryna ǵylymı jańalyqtardy engizý deńgeıin arttyrý úshin «Ǵylymı jáne (nemese) ǵylymı-tehnıkalyq qyzmet nátıjelerin kommersııalandyrý týraly» zań qabyldanǵan bolatyn. Zańnyń negizgi maqsaty joǵary oqý oryndary men ǵylymı uıymdar jasaǵan jańa tehnologııalardy kommersııalyq turǵyda paıdalanýdy yntalandyrý bolyp tabylady. Qor kommersııalandyrý jobalaryna memlekettik qarjylandyrýdyń jalpy kóleminiń 14, 5 paıyzy (5 mlrd teńge) mólsherinde jeke bıznesten qosymsha qarjy tartty.
Qazirgi kezde kommersııalandyrý jobalaryn iske asyrý nátıjeleri boıynsha 31 joba ónim shyǵarý kezeńine shyqty, bıýdjetke 964 mln teńge salyq aýdarymdary qamtamasyz etildi, jumys oryndary ashyldy.
Senat Tóraǵasy ǵalymdardyń ózekti máseleleri men usynystaryn tyńdaı kelip, «Ǵylymı jáne (nemese) ǵylymı-tehnıkalyq qyzmet nátıjelerin kommersııalandyrý týraly» zańǵa sáıkes Qordyń tabys tabýy tıis ári tabys taba alatyn tolyqqandy ınvestor bolýy kerek ekenin atap ótti. Bul jaǵdaıda Qor árbir bıznes-jobany óziniń menshigi retinde baǵalaıtyn bolady, Qordyń tabystylyǵy ulǵaıady, ǵylym men bıznes jobalardy kóbirek alady. Qarjylandyrý kózderin biriktirýdiń naqty múmkindigi paıda bolady.
D.Nazarbaeva sonymen qatar ǵylymı jobalar marketıngin belsendi túrde júrgizip, ǵylymı qyzmetterdiń nátıjelerin buqaralyq aqparat quraldarynda keńinen jarııalaý, respýblıkalyq telearnalarda arnaıy aıdarlar qalyptastyrý, áleýmettik jelilerdi paıdalaný jáne basqa da jumystardy qolǵa alý qajet dep esepteıdi.
Zańnamalyq aktilerdegi qaıshylyqtarǵa baılanysty normatıvtik-quqyqtyq aktilerge, sondaı-aq qoldanystaǵy salyq salý júıesine birqatar máseleler boıynsha ózgerister engizý qajet bolyp otyr.
