Ortalyqta shaǵyn jáne orta bıznes, turǵyn úı, jumyspen qamtý, densaýlyq saqtaý máseleleri, memlekettik baǵdarlamalarǵa qatysý múmkindikteri týraly keńes berý kabınetteri men psıholog, ádistemelik jáne medısınalyq keńes berý kabınetteri, sondaı-aq, «Jas Sarbaz» áskerı-patrıottyq ortalyǵy jumys isteıdi. Sonymen qatar, munda ınternet-kitaphana, antıkafe, IT-park, konferens-zal jáne jattyǵý zaly bar. Ortalyqtyń jalpy aýdany - 3870 m2, ol aýysymyna 670 kelýshige eseptelgen, munda 32 maman qyzmet atqarady.
Prezıdent ortalyqtyń qyzmetimen tanysyp, aımaq jastarymen kezdesti. Sankt-Peterbýrg memlekettik ónerkásiptik tehnologııalar jáne dızaın ýnıversıtetiniń túlegi Jazıra Smaılova jas urpaqqa jasalyp jatqan qamqorlyǵy men qoldaýy úshin Memleket basshysyna alǵysyn bildirdi. Oblysta 2014 jyldan bastap aımaq basshylyǵynyń bastamasymen qyzylordalyq mektep túlekteri Reseı Federasııasy Úkimetiniń granty esebinen Máskeý men Sankt-Peterbýrgtiń aldyńǵy qatarly tehnıkalyq joǵary oqý oryndarynda bilim alý múmkindigine ıe bolǵan edi. 2018 jyly 32 túlek oqýyn támamdap, aımaq kásiporyndaryna jumysqa ornalastyryldy. 2019 jyly taǵy 132 bilim alýshy oqýyn aıaqtaıdy dep kútilip otyr. Barlyǵy 520 syrboıylyq jas Reseıdiń ozyq ınjenerlik joǵary oqý oryndarynda bilim alyp jatyr.
Kezdesýden soń birqatar respýblıkalyq jáne halyqaralyq vokaldyq óner baıqaýynyń jeńimpazy Konstantın Lýsa Prezıdentke Syr jastarymen estelik sýretke túsýdi usyndy.
