Búginde elimiz balalar densaýlyǵyna erekshe mán berip otyr. Taǵdyr jazýymen tósekke tańylǵan, aqyl-oı, dene damýynda aýytqýy bar balalar memleket qamqorlyǵynan tys qalmaq emes.
2017 jyly paıdalanýǵa berilgen kópbeıindi aýrýhana sonyń bar aıǵaǵy. Aýrýhanada 11 bólim, 5 operasııalyq blok, reanımasııalyq jáne anestezııaǵa arnalǵan bólimder bar. Sondaı-aq munda keńes berý-dıagnostıkalyq bólimi jumys isteıdi. Aýrýhana zamanaýı medısınalyq qural-jabdyqtarmen tolyq qamtylǵan. Mamandar sheteldik klınıkalarda biliktiligin arttyrǵan.
Oblystyq aýrýhananyń bas dárigeri Zoıa Kóshenova Memleket Basshysyna osyndaǵy jaǵdaıdy baıandap berdi. Joǵary medısınalyq qural-jabdyqtar jetispegen burynǵy kezderi Qyzylordalyq balalar Almaty, Astana qalalaryna joldamamen baryp emdeler eken. Qazir dárigerlik kómek qoljetimdi, medısınalyq qondyrǵylar halyqaralyq standarttarǵa negizdelgen. Kóp salaly balalar aýrýhanasy kúrdeli otalar bolmasa barlyq em-domdy ózderi jasaıdy.
