– Áleýmettik ádilettilikti tý etip, ózin qoǵamnyń eshkimnen kem emes bir múshesindeı sezinýine jaǵdaı jasalýyn maqsat tutqan bul jobanyń iske asyrylýyna yqpal etý bizdiń paryzymyz, – dep bastady óz sózin partııanyń Bostandyq aýdandyq fılıaly tóraǵasynyń birinshi orynbasary Baımurat Jambylov.
«Múgedekter qoǵamy» qoǵamdyq birlestiginiń tóraǵasy Ulan Ińkárbekov kembaǵal azamattarǵa jasalyp jatqan jaǵdaıdy tilge tıek etse, Bostandyq aýdany áleýmettik bóliminiń ókilderi Á.Amanova men A.Ahmetova múgedekterge tıesili tólemaqylar túrleri men jeńildikter týraly jan-jaqty málimet berdi. Al aýdandaǵy medısınalyq mekemeniń bas dárigeri Zýhra Omarova saıajaılarǵa joldamalar men emdelýge kvota alý máselelerine toqtaldy.
Endigi kezekte múgedek bala asyraýshy otbasylar men múmkindigi shekteýli azamattar, jetim balalar men jalǵyz basty analar máseleleri birtindep qolǵa alynbaq.
Bul aýdanda barlyǵy 1 602 múgedek bar, onyń 1 018-i 1 jáne 2-toptaǵy múgedekter bolsa, 594 adam 3-toptaǵy múgedekter. Múmkindigi shekteýli azamattardy mamandyqtary boıynsha nemese basqalaı da ártúrli jumystarmen qamtý qajet.
Kezdesýge kelgen ózi de múgedek, qyzy da múgedek zeınetker qarııanyń qaladaǵy shıpajaılardyń birine joldama alýǵa kómek suraǵan ótinishi oń sheshildi. Kóp balaly jesir ananyń 3 birdeı balasy aýtızm aýrýymen aýyrady, olardyń biriniń emi 250 myń (barlyǵy 750 myń) teńge turady. Nur-Sultan qalasyndaǵy Ana men bala ortalyǵyna, Respýblıkalyq balalardy ońaltý ortalyǵyna joldama alýǵa suraǵan ótinishi de jerde qalmaı, qalalyq qoǵamdyq densaýlyq saqtaý basqarmasyna hat joldandy.
Sondaı-aq 3 balasy bar jalǵyz basty ananyń 2 jasqa kelip qalǵan balasynyń áli júre almaıtynyn, oǵan arnaıy ortopedııalyq aıaq kıim men balalaryna arnaıy áleýmettik járdemaqy alýǵa kómektesýdi suraǵan ótinishteri de aıaqasty qalmady. Ortopedııalyq ortalyq arqyly arnaıy aıaq kıim máselesi sheshiletin bolsa, al aýdandyq áleýmettik ál-aýqat bóliminiń mamandary ótinish ıesiniń ekinshi máselesin taıaý ýaqytta qarastyrmaq.
Saparbaı PARMANQUL,
«Egemen Qazaqstan»
ALMATY
