Áskerı medbıkege eskertkish qoıdy

Qostanaıdaǵy Jeńis saıabaǵy – oblys ortaly­ǵyndaǵy kórikti orynnyń biri. Maıdanda erlik kórsetken qostanaılyq jaýyngerlerge qoıylǵan bas eskertkish, bozdaqtar tizimi, Máńgilik alaý jáne soǵys tehnıkalarynyń ashyq aspan astyndaǵy mýzeıi qataryna jýyrda soǵys jyldaryndaǵy medbıkeniń músini qosyldy. Iyǵyna ilgen avtomaty, janynda dári-dármek salynǵan sómkesin artyp qoıǵan ıti bar medbıke jaý oǵynan jaradar bolǵan jaýyngerlerge jetýdi oılap, ójettene qarap tur. Olar soǵysta talaı jaýyngerdi ajal tyrnaǵynan aman alyp qaldy. Jaradar jaýyngerlerdi tasyp júrip, medbıkelerdiń ózderi de oqqa ushty. 

Eskertkishti ornatqan aýyl sharýashylyǵy salasynyń ardageri Bek Júsipovti bul oı osydan 5-6 jyl buryn mazalaǵan eken. 

– Densaýlyǵym úshin Esentýkıge barǵanymda medbıkege qoıylǵan músin meni tolqytyp jibergen edi. Aıtary bolsa qara tas ta kádimgideı júregińdi jylytady eken. «Mundaı eskertkish bizde nege joq?» dep oıladym. Qostanaıǵa kelgen soń belgili azamat Jandilda Maqanovqa oıymdy aıttym. Men aýyldaǵy sharýa baqqan, jer kútken kásipkermin. Ol kisi bilimdi, saıasattan, tarıhtan, mádenıetten habary mol adam ǵoı. Ol oılanyp, «óli rıza bolmaı, tiri baıymaıdy» degendeı, eskertkishtiń áskerı medbıkege qoıylǵany durys degen pikirin aıtty. О́kinishtisi, taǵdyrdyń isimen ótken jyly Jandilda Qojahmetuly qaıtys bolyp ketti. Men osy bastamany aıaǵyna deıin jetkizýdi oıladym, – deıdi Bek Júsipov. 

Bek aǵa bul iske ótken kúzden bastap kirisedi. Alǵashqyda ony júre tyńdaǵandar bolǵanymen, is sátimen júzege asty. О́ziniń oıyn, bastamasyn oblys ákimi Arhımed Muhambetovke aıtqanda, ol basta­many birden qoshtady. Bekeń de oıǵa alǵan isine shabyttana kirisipti. Eskertkishti Aqtóbe qalasyndaǵy sheberlerge plastıkten quıdyryp ákeldi. 

– Mundaıda jalǵyz júgirdim deýge bolmaıdy, jaqsylardyń qoldaý-kómeginsiz ne isteı alar edim? Arhımed Begejanulyna jáne ıgi iske janashyrlyq tanytyp, kómegin bergenderge rahmetimdi aıtamyn, – deıdi Bek aǵa. 

Saıabaqqa kelgender medbıke eskertkishiniń aldynda sál kidirmeı óte almaıdy. Júregi meıirimge toly, qoly shıpa jandardyń ajalǵa qarsy turar arpalysy búgin de jalǵasyp jatyr. Qazir de naýqastardy quraq ushyp kútetin medbıkeler jumysy jeńil emes. Eńbekqorlyq pen meıirimdilikti boıyna jıǵan, kerek kezinde erlikke daıar jannyń tas beınesi barsha qaýymnyń júregine shýaq quıady. Izgilik qonǵan jerde medbıkeniń de orny bar.