Sambodan KSRO sport sheberi Rústem Ybyraev, Qazaqstannyń sport sheberleri Baýyrjan Ábdirahmanov, Qaırat Sháripov, Murat Matyshev. Mine, osyndaı azamattar boz kilemde el namysyn qorǵaǵan. Respýblıkalyq, odaqtyq jarystarda atoı salǵan atan jilikti balýandar. Búginde sol dańqty aǵa býynnyń izbasarlary dástúrdi jalǵastyrýda. Taıaýda ótkizilgen onynshy respýblıkalyq týrnırge uzyn-yrǵasy 300-ge jýyq balýan qatysyp, boz kilemde baq synasty. Olar aldymen jekeleı synda beldesse, keıin komandalyq saıysta kúsh synasty.
–Biz eske alyp otyrǵan balýandar aýdan sportyn ǵana emes, el sportyn damytýǵa úles qosyp edi,–deıdi Ereımentaý balalar men jasóspirimder sport mektebiniń dırektory Sársenbek О́tepov,–top jaryp, júlde alyp qana qoıǵan joq, sońdarynan ergen jastardy tárbıeledi. О́zderiniń boıyndaǵy shıyrshyq atqan kúsh-jigermen ǵana emes, elin súıgen er júrektigimen de ónege boldy. Sondyqtan, abyroıly attaryna ýaqyt kireýkesi túspesin dep jańǵyrtyp jatyrmyz.
Jarysqa 10 oblystyń myqtylary jınalǵan. 2003-2005 jyldary týǵan 300-ge jýyq jasóspirim balýandar toǵyz salmaq dárejesin boıynsha baq synasty. Beldesý barysynda Nur-Sultan, Qaraǵandy qalalary men Pavlodar, Shyǵys Qazaqstan oblystarynyń balǵyn balýandarynyń baby kelisip turǵandyǵy baıqaldy.
–Atan jilik azamattardyń kóbi aýylda ǵoı. Bolashaq olımpıada chempıondary osyndaı jarysta shyńdalady,–deıdi bokstan Qazaqstannyń eńbek sińirgen sport sheberi Ádilbek Nııazymbetov.
Eki kúnge sozylǵan básekede Kókshetaý, Ereımentaý, Qostanaı men Qaraǵandynyń balýandary top jardy. Ásirese, ereımendik balýan Nurhat Beıbitovtiń sheberligi kórermendi tánti etti.
Komandalyq básekede bas júlde qostanaılyqtarǵa buıyrsa, qaraǵandylyqtar ekinshi, Pavlodar oblysynyń balýandary úshinshi orynǵa ıe boldy.
