Astyqty ólkede jyl saıyn kúzgi jıyn-terin kezinde kósh bastaıtyn aýdannyń dıqan-mehanızatorlary bıyl táp-táýir daıyndyq jasaǵan syńaıly. Jumys aýqymy da az emes. 459,3 myń gektar alqapqa bıdaı, dándi jáne burshaq daqyldary, maıly daqyldar sebilmekshi. Onyń ústine 472 gektar jerge kartop pen kókónis otyrǵyzý mejelengen.
Negizinen jazyq dala bolǵandyqtan, kóktemgi dala jumystaryna deıin topyraqtyń keýip ketetini bar. Qysta qar toqtatýdyń da múmkinshiligi az. Sondyqtan, endigisi ylǵal jabý. 224,8 myń gektar jerdiń ylǵalyn jabý josparlansa, onyń 32,5 paıyzy ǵana júzege asyrylypty. Dándi daqyldyń negizgi sharty ylǵal bolatyn bolsa, alqaptardy aramshópten aryltý, kúni buryn óńdeýden ótkizý de asa mańyzdy. Bul oraıda dıqandardyń nıeti kóńil qýantady. Olar 140 myń gektardan astam alqapqa dán sińirmes buryn óńdeý júrgizbekshi. Onyń ishinde 90 myń gektardan astam alqap hımııalyq ádispen óńdelmek. Jaqsynyń dıqandary ylǵal jınaǵysh tehnologııany da qoldanýda. Bıylǵy egiste 308,4 gektar alqapqa osyndaı ádis qoldanylady.
Ár jyl saıyn egis alqaptaryn tyńaıtqyshpen baıytý da qolǵa alynǵan. Aýdan dıqandary 4,5 myń tonna ammofos, amıaktyq selıtra, sýlfoammofos tyńaıtqyshtaryn satyp alǵan.
Jyl saıyn tuqymdy jańalap otyrýǵa, sapasyn jaqsartýǵa kóp kóńil bólemiz. Kóktemgi egiske qajetti 55,8 myń tonna tuqym zerthanada saraptamadan ótkizildi. Sapaly tuqymmen ózimizdi ǵana emes, kórshiles aýdan sharýashylyqtaryn da qamtýǵa qaýqarymyz jetedi, – deıdi aýdan ákiminiń orynbasary Rústem Ramazanov, – qazir bizdiń sharýashylyqtarda 15 tonnadan astam tuqym satýǵa qoıylǵan.
Bir jaqsysy, mashına-traktor parki de ishinara jańarý ústinde eken. О́tken jyly 125 qýatty tehnıka satylyp alynypty. Kóktemgi dala jumystaryna qajetti ár lıtri 183 teńgeden baǵalanǵan 6110 tonna dızel otyny jetkizilgen.
Jaqsy aýylynyń irgesindegi «Aıbat» jaýapkershiligi shekteýli seriktestiginde bolǵanymyzda sharýashylyq basshysy Asqar Japarovpen tildestik. Basshynyń aıtýyna qaraǵanda, ótken jyly seriktestik 26434 tonna astyq jınaǵan eken. Agrotehnıkalyq sharalardy ýaqtyly oryndaýynyń arqasynda gektar berekesi 17,3 sentnerden aınalypty. Bul jaqsy kórsetkish. Seriktestik dıqandary sheteldik aýyl sharýashylyǵy tehnıkalarynyń keıbir aqaýlaryn arnaıy sehta jóndeý ústinde. Kóktemgi dala jumystaryn 19 mamyrda bastap, on kúnniń ishinde aıaqtap shyǵýdy mejelep otyr.
Jaqsynyń jalpaq dalasyn ıgilik alqabyna aınaldyrǵan qajyrly jandar qaýyrt naýqanǵa tyńǵylyqty daıyndyq jasaǵan eken. Kókten ıip, jerden berse, yryzdyq ta mol bolary sózsiz.
Aqmola oblysy,
Jaqsy aýdany
