Amerıkanyń “Forbs” jýrnaly álemdegi baılardyń tizimin jarııalady. О́tken jyldyń qorytyndysy boıynsha baılar tizimin 53,5 mıllıard dollar baılyǵy bar meksıkalyq telemagnat Karlos Slım bastap otyr. Ol birinshi orynnan ataqty amerıkalyq Bıll Geıtsti (53 mıllıard) yǵystyrdy. Úshinshi orynda – taǵy da bir amerıkalyq Ýorren Baffet (47 mıllıard). Bir qyzyǵy – daǵdarys kezinde Reseıde mıllıarderler kóbeıipti. “Forbstyń” tizimine buryn 32 reseılik baı kirse, endi olardyń sany – 64.
Azarov – premer-mınıstr
Basqa jerde bıliktegi ekinshi tulǵa sanalatyn premer-mınıstrlerdiń kim bolǵanyna mán berile bermeıdi. Al Ýkraınada – ózgeshe. Bul prezıdent V.Iаnýkovıchtiń baǵytyn bildiredi. Buryn Iý.Tımoshenko atqarǵan qyzmetti endi N.Azarov atqarady. Demek, prezıdent óz adamdaryna senim artady. Úmitkerdiń biri S.Tıgıpko premerdiń kóp orynbasarlarynyń biri ǵana boldy.
Ata zańda aqaý kóp
Moldavııa basshylyǵy el konstıtýsııasyna ózgerister engizý úshin búkilhalyqtyq referendým ótkizý jóninde sheshim qabyldady. Onyń da jóni bar: sol ata zańdaǵy aqaýlyqtarǵa baılanysty. Respýblıka birazdan beri óz prezıdentin saılaı almaı otyr, tipti qajetti ýaqytynda parlament saılaýyn da ótkize almaıdy. Sondaı-aq qazir prezıdent mindetin atqarýshy Mıhaı Gımpý referendýmǵa memlekettik tildi moldavan tili degennen rýmyn tili dep ataýǵa ózgertýdi usynyp otyr. Kommýnıster bul referendýmǵa boıkot jarııalamaq.
Soǵysqa daıyn
KHDR úkimeti óz áskerin joǵary jaýyngerlik daıyndyqqa qoıǵanyn málimdedi. Muny olar Ońtústik Koreıadaǵy AQSh-pen birigip ótkizilip jatqan áskerı jattyǵýlarǵa jaýap dep otyr. Sol jattyǵýlardy olar Soltústikke shabýyldyń repetısııasy sanaıdy. Soltústik jaǵynyń áskerı qolbasshysy Ońtústik Koreıany AQSh-ymen qosa qoparyp tastaýǵa daıyn ekendikterin habarlady. Qorqytýǵa da bolar, biraq shamalap aıtqan da jón ǵoı.
Chılıde – jańa prezıdent
Jer silkinip, astan-kesten bolyp jatqan Chılıde jańa prezıdent Sebestıan Pınera qyzmetine kiristi. Buǵan deıin 20 jyl solshyldardyń bıliginde bolǵan bul elde asa baı adamnyń prezıdent bolyp saılanýy da chılılikterdiń bir ózgeris kútkeni shyǵar. Degende, sońǵy prezıdent áıel azamat Mıshel Bachelet halyqqa jaǵymdy boldy. Tek onyń qaıta saılanýyn zań kótermedi. Pıneraǵa bılik tizginin ustaý ońaıǵa soqpas. Aqpandaǵy jer silkinisi elge 30 mıllıard dollar zııan keltirdi. Bir qyzyǵy – jańa prezıdenttiń ınaýgýrasııasy ótip jatqanda da 7,2 ball jer silkinisi bolypty.
Dos bolý qıyn el
Irannyń kólik mınıstri Hamıd Behbahanı sol elde nan taýyp júrgen reseılik ushqyshtarǵa eki aıda tabandaryńdy jaltyratyńdar dep nusqaý berdi. Sebebi – ózimizde ushqysh jetedi deıdi. Jetse, buryn nege jumysqa alǵan?! Munyń shyn sebebi basqada. Reseı amalsyz AQSh usynyp otyrǵan Iranǵa qarsy sanksııany qoldaýǵa májbúr. Sonan soń Iranǵa S-300 zymyran-zınıt keshenin berse de abyroıy tógiledi. Iran ony túsingisi kelmeıdi. Jalpy, Iranmen dos bolý qıyn.
Lańkester orny – túrme
Tájikstanda “Tablıǵı Djamaat” musylman qozǵalysynyń músheleri men jaqtastaryna sot boldy. Aıyby – ekstremıstik uıymdarmen baılanysy barlyǵy. 23 adam úsh jyldan alty jylǵa deıin sottalsa, 33 adamǵa aqshadaı aıyp belgilendi. Jalpy Tájikstanda “Tablıǵı Djamaattyń” qyzmetine tyıym salynǵan.
Qaraqshylar quryqtaldy
Fransııanyń áskerı teńizshileri Somalı jaǵalaýynda kúzette júrgen kezinde 35 somalı qaraqshysyn qamaýǵa alypty. Bul – sońǵy eki jyldaǵy qaraqshylarǵa qarsy kúrestegi eń úlken “olja”. Somalı qaraqshylary búkil álemdi shýlatyp júr. Bul mańmen kemesi ótpeıtin el az. Qaraqshylar kemeni ustaıdy da, bosatqanǵa aqsha suraıdy. Bermeseń, adamyńdy óltirip, kemeńdi qaryq qylady. Kóp el berip qutylady.
Ázirlegen Mamadııar JAQYP.
