Jaqynda Qyzylordadaǵy gaz beketiniń qyzmetkeri mekemeniń qarjysyn tún toryǵan qaraqshylarǵa aldyryp alǵan. Eshkimniń sezik almaýyna sebep, álgi jumysshy túnde betperde kıgen eki qaraqshy qarýmen qorqytyp, kassadaǵy 263 myń teńgeni tartyp alyp ketkenin aıtqan. Beket basshylyǵy qaq-soǵy joq, kúzetshi ári operator bolyp isteıtin jigittiń sózine senip, polısııaǵa aryz túsiredi. Osylaısha, qalalyq polısııa basqarmasy Qylmystyq kodekstiń 191-babynyń 2-bóliginiń 3-tarmaǵymen sotqa deıingi tergep-tekserý amaldaryn qolǵa aldy.
Bul azamattyń jalǵan habarlama berý jaǵdaıy keıin taǵy jalǵasypty. Ol tańǵy ýaqytta gaz quıý beketiniń aldynda betperde kıgen belgisiz eki azamat pyshaqpen qorqytqanyn aıtqan. Olar mekemege tıesili 240 myń teńgeni «tartyp alyp» ketken. Osylaısha gaz quıý beketiniń jumysshysy ózin jábirlenýshi retinde kórsetken. Soǵan baılanysty 102 arnasyna habarlama túsken. Atalǵan habarlama boıynsha tez arada oqıǵa ornyna jedel tergeý toby jiberilipti.
«Baqsaq, baqa eken» demekshi, mekemeniń aqshasyn qumar oıynǵa tigip jiberip, ábden dándep alǵan «tonaýshy» álgi jigittiń ózi bolyp shyǵady.
Osyǵan baılanysty Qyzylorda oblystyq Ishki ister departamentiniń baspasóz qyzmeti: «Polısııa qyzmetkerleri bolǵan oqıǵanyń mán-jaıyn jan-jaqty, tolyq jáne obektıvti túrde zerdeledi. Nátıjesinde ózin jábirlenýshi retinde kórsetken azamattyń jalǵan habarlama bergeni anyqtaldy. Eki derekke qatysty qylmystyq quqyq buzýshylyq múldem oryn almaǵan. Gaz beketiniń jumysshysy aqshany qumar oıyndarǵa salyp jibergen. Zańsyz is-áreketin jasyrý úshin jalǵan habarlama bergen. О́zin jábirlenýshi retinde kórsetken álgi azamat soǵan baılanysty bergen aryzynan bas tartqan. Ol osy bekettiń operatory men kúzetshisi qyzmetin qosa atqarǵan», dep habarlaıdy.
Qazirgi tańda Qylmystyq kodekstiń 189-babynyń 1-bóligimen sotqa deıingi tergep-tekserý júrgizilip jatyr. Onda senip tapsyrylǵan bóten múlikti ıemdenip alý nemese talan-tarajǵa salý jaıy kórsetilgen. Sondaı-aq ol jalǵan habarlama berý deregi oryn alýyna baılanysty 419-babynyń 3-bóligimen paıdakúnemdik nıetpen jasalǵan kópe-kórineý jalǵan sóz jetkizý boıynsha jaýap beretin bolady.
Kúdiktige qatysty «kepil» túrindegi bultartpaý sharasy qoldanyldy. Kúdikti tulǵanyń kinási dáleldengen jaǵdaıda sot sheshimimen onyń úsh jyldan jeti jylǵa deıingi merzimge bas bostandyǵy shekteledi nemese sol merzimge bas bostandyǵynan aıyrý jazasy qoldanylýy múmkin.
Qumar oıynnyń qulqynyna túsip, ózi nápaqasyn aıyryp otyrǵan mekemeniń qarjysyn urlaǵan jigit búginde barmaǵyn shaınap otyr.
Qyzylorda oblysy
