Soǵan sáıkes keshe TMD Atqarý komıteti tóraǵasynyń birinshi orynbasary V.A.Gýmınskıı, Atqarý komıteti bóliminiń bastyǵy E.A.Sloboda, TMD Atqarý komıtetiniń keńesshisi O.V.Kýleba, E.V.Kozıak jáne TMD Atqarý komıtetiniń konsýltanty I.I.Podlýskaıa Ortalyq saılaý komıssııasyna keldi.
Atalǵan baıqaýshylarmen OSK tóraǵasy Berik Imashev kezdesti. Sondaı-aq kezdesýge OSK tóraǵasynyń orynbasary K. Petrov pen onyń múshesi Z. Baımoldına da qatysty. B.Imashev kezdesý sheńberinde V.Gýmınskııge elektorattyq naýqannyń barlyq kezeńderi kezindegi atqarylǵan ister týraly, ıaǵnı usyný, tirkeý, saılaýaldy úgit jáne daýys berý kúni júrgiziletin sharalar men «Saılaý týraly» Konstıtýsııalyq zańǵa 2017-2018 jyldary engizilgen ózgerister týraly aıtyp berdi.
Jalpy TMD-nyń Baıqaýshylar mıssııasy Qazaqstandaǵy saılaýdy, onyń ishinde Qazaqstan Respýblıkasy Prezıdentiniń saılaýyn baıqaýda úlken jumys tájirıbesine ıe ekendigin atap ótken jón. TMD-dan 700-den astam Baıqaýshylar mıssııasy Qazaqstanda 2015-2016 jyldary ótken eki saılaý naýqanyn baıqaýǵa qatysqan bolatyn. Al «Saılaý týraly» Konstıtýsııalyq zań qadaǵalaýdyń tıisti tártibin kózdeıdi.
TMD Atqarý komıteti tóraǵasynyń birinshi orynbasary V.Gýmınskıı óz kezeginde B.Imashevqa kezdesýdi uıymdastyrǵany úshin alǵysyn bildirdi jáne TMD Atqarý komıteti QR OSK-nyń saılaýdy ótkizýge baılanysty barlyq is-sharalaryn muqııat baqylaǵany týraly habarlady. V. Gýmınskıı:
«Bizdiń kezdesýimizden keıin, ıaǵnı búgingi kúnnen bastap TMD Baıqaýshylar mıssııasy osynda jumysyn jalǵastyryp, Qazaqstan Prezıdentiniń kezekten tys saılaýyn tolyq kólemde baıqaýǵa kirisedi. Jalpy, naqtyraq aıtar bolsam, TMD memleketteri tarapynan Qazaqstandaǵy kezekten tys prezıdenttik saılaýdy baıqaý mıssııasy búginnen bastalyp otyr. Osyǵan oraı mıssııa shtaby qurylyp, ony daıarlaý, qyzmettik mindettemelerin oryndaý jumystaryna kiristik. Mıssııa Qazaqstan Syrtqy ister mınıstrliginen shaqyrtý aldy. Al TMD Atqarý komıteti Ýkraınadan basqa Dostastyqqa múshe elderdiń bárine Parlamentaralyq Assambleıaǵa tıisti usynys joldady. TMD-nyń mıssııa quramynda 300-ge tarta baıqaýshy bolady dep kútilip otyr», – dedi.
О́tken jyly «Saılaý týraly» Konstıtýsııalyq zańǵa shet memleketter men halyqaralyq uıymdardyń baıqaýshylaryna aýdarmashy ilesip júrýge quqyly ekeni týraly jańa norma da engizildi. Osyǵan baılanysty Konstıtýsııalyq zańnyń 20-2-babynyń 2 jáne 4-tarmaqtaryna sáıkes shet memleketter men halyqaralyq uıymdardyń baıqaýshylary Qazaqstan Syrtqy ister mınıstrliginiń usynýy boıynsha Ortalyq saılaý komıssııasynyń janynda akkredıttelip, olarǵa OSK belgilegen úlgidegi kýálik beriledi. Al akkredıtteý daýys berýge bes kún qalǵanda, ıaǵnı 2019 jylǵy 3 maýsymda jergilikti ýaqyt boıynsha 18.00-de aıaqtalady dep belgilengeni málim.
