Onda bas qosqan Qazaqstannyń jáne Reseıdiń Qostanaı oblysymen irgeles Chelıabi, Qorǵan jáne Orynbor oblystarynyń jastary, qashannan irgeles qonǵan, yntymaqtastyqty damytýǵa múddeli eki eldegi qoǵamdyq uıymdar ókilderi izgilikke bastaıtyn eriktilik – volonterlik qozǵalystar, osy oraıdaǵy halyqaralyq bastamalar týraly oı-pikirlerin jáne eriktilik salasyndaǵy úzdik tájirıbelerin ortaǵa saldy. Eriktilik kóptegen elde keń qanat jaıǵan, adamdardyń qaıyrymdy isteri qoǵamdy izgilendiredi.
– Eriktiler – naǵyz batyr, patrıot, meıirimdi jandar. Osy zalda otyrǵan 1000 eriktiniń árqaısysy aınalasyna kómek qolyn sozýǵa daıar. Qoǵamdy qaıyrymdy etetin ózderińiz, – dedi forýmnyń plenarlyq májilisiniń moderatory, elimizdegi «Volonterler lıgasy» qoǵamdyq qorynyń negizin qalaýshy Qaıyrjan Meńdiǵalıev.
Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev 2019 jyldy Jastar jyly dep jarııalady. Merekesi de, mindeti de mol jyldyń Jol kartasy aıasynda ótip otyrǵan forýmǵa qatysýshylardy oblys ákimi Arhımed Muhambetov quttyqtap, jastar saıasatyna qatysty oblysta bitken jaqsy isterdi atap ótti. Odan keıin D.Abaev elimizdegi jalpy jastarǵa berilip otyrǵan mol múmkindikterdi tilge tıek etti.
– Táýelsizdiktiń alǵashqy kúninen bastap, bizdiń memleket jastar isin nazardan tys qaldyrmady. Elbasy Nursultan Nazarbaev «Bolashaq» baǵdarlamasyn iske qosty. Ol boıynsha 13 myń qazaqstandyq jas shetelderdegi eń tańdaýly degen ýnıversıtetterden bilim aldy. Ol qazir de jalǵasyn taýyp otyr. Jastar jyly memleket jastardyń jumysqa ornalasýy, kásipkerlikti bastap ketýi, olardy jeńildikti baspanamen qamtamasyz etý, sapaly bilim alýlary úshin qomaqty qarjy salyp otyr. Jastar jylyndaǵy osyndaı sharalar Qazaqstandaǵy 4 mıllıon jastyń 70 paıyzyn qamtıtyn bolady. Qazir biz jańa sıfrlandyrý dáýiriniń tabaldyryǵyn bastyq, sonyń naǵyz elshisi ózderińiz bolasyzdar. Búgingi jastar óziniń ıgilikti, qoǵamdy damytýǵa úlken úles bolyp qosylatyn paıdaly isin óziniń azamattyq ustanymy arqyly kórsetedi. Sondaı izglikti istiń biri eriktiler qozǵalysy qarqyndy damyp keledi, – dedi Abaı Áskerbekuly.
Munan keıin forým qonaǵy, Reseı jastar isi jónindegi federaldyq agenttigi jetekshisiniń orynbasary Andreı Platonov volonterlik jumystyń elderdi yntymaqqa jalǵaıtyn kúsh ekenine toqtaldy.
– Memlekettik organdar eriktilermen birge tize qosyp, qoǵamdaǵy kedergilerdi jeńedi, eń aýyr degen kúrdeli isterdiń sheshimin tabamyz. Qazir Reseıde iri eriktiler uıymdary bar. Olardyń kóshbasshylary adamdardy ıgi iske jumyldyryp qana qoımaı, zańnamany da jaqsy biledi. Olardyń bastamasymen normatıvtik aktiler tolyqtyrylyp, volonterlik qyzmettiń keń qanat jaıýyna kedergiler azaıdy,– dedi A.Platonov Reseıdegi jaqsy tájirıbeni ortaǵa salyp.
Qazir eriktiler jumysy ekologııalyq, patrıottyq nemese qutqarý sekildi túrli baǵytta damyp keledi. Mysaly, osy forým aldynda ǵana kórshi eki eldiń aýmaǵynan aǵatyn Tobyl ózeniniń boıynda «ESO – challenge Qostanai» ekologııalyq aksııasy ótkizildi. Ol oblystyń Jitiqara, Qamysty, Denısov, Taran, Qostanaı aýdandaryn, Lısakov, Rýdnyı qalalaryn qamtydy. Forým aıasynda Qostanaı qalasynda Reseı-Qazaqstan jastaryn biriktiretin Tobyl ózeniniń jaǵalaýyn tazalaıtyn taǵy da eko-aksııa ótti. Bul jastar arasynda ekologııalyq mádenıetti, eriktilikti damytýǵa baǵyttalǵan ıgi jumystyń biri ǵana bolatyn.
– Mundaı forýmdardyń jastarǵa bereri kóp. Jalpy, eriktiliktiń ózi jastar úshin úlken tárbıe quraly der edim. Ol aldymen jastardyń bos ýaqytyn tıimdi paıdalana bilýine, óz ustanymyn qalyptastyrýǵa úıretedi. Men kásipkermin. Erikti bolmasam da turmysy tómen jandarǵa kómektesip júremin. Jastar arasynda eriktiliktiń damyp kele jatqandyǵy áleýmettik jelilerdegi jazylǵan jaılardan jaqsy bilinedi. О́zgeniń qaıǵysyn bólise bilý, meıirimdilik kórsetý eń jaqsy qasıettiń biri bolsa, búgingi qoǵamda ol eriktilik qozǵalysy arqyly baıı túsedi, – dedi jastar forýmyna Oral qalasynan kelip qatysqan Marına Bıǵalıeva.
Búgin jastar forýmynyń jumysy jalǵasady.
QOSTANAI
