Aqtaý qalasynda halyq jazýshysy, qazaq ádebıetiniń iri ókili, memleket jáne qoǵam qaıratkeri Ábish Kekilbaıulynyń 80 jyldyq mereıtoıy qarsańynda talantty oqýshylar arasynda ótken II respýblıkalyq Ábish oqýlary baıqaýy osyny ańǵartty.
Á.Kekilbaıulynyń jubaıy Klara Jumabaıqyzy jáne zamandastary, ardager ustazdar qatysqan ashylý saltanatynan soń tórt baǵyttan turatyn baıqaý bastaldy.
Mańǵystaý, Aqtóbe, Batys Qazaqstan, Shyǵys Qazaqstan, Almaty, Jambyl, Qostanaı oblystarynan, sondaı-aq Nur-Sultan qalasynan 100-ge tarta oqýshy qatysqan baıqaýdyń sahnalyq qoıylym baǵytyna 12 top, mánerlep oqý baǵytyna 13 oqýshy, ǵylymı jobaǵa 14 oqýshy qatyssa, ıllıýstrasııalyq sýrettiń úı tapsyrmasy bólimine jumystaryn usynǵan 13 qatysýshy taqyryptar boıynsha sýret saldy. Baıqaý barysynda jazýshynyń «Teńiz jaǵasyndaǵy oı», «Áke», «Arheolog», «Úrker», «Mahabbat munarasy», «Shyńyraý», «Abylaı han», «Kóldeneń kók atty», «Hansha darııa hıkaıasy» atty tarıhı oqıǵaǵa toly, adamgershilikke, óshpes qundylyqtarǵa baýlıtyn kesek týyndylarynan sahnalyq qoıylym qoıylyp, oqýshylar qalamgerdiń prozasy men poezııasyn mánerlep oqydy. Sondaı-aq Á.Kekilbaıulynyń shyǵarmalary oqýshy tanymynda jan-jaqty zerdelenip, zertteý nysanyna aınalýmen qatar, shyǵarmaǵa arqaý bolǵan taqyryptar bala qııalynda, bala qalamynda ıllıýstrasııalyq sýretter arqyly beınelendi.
Baıqaý qorytyndysynda Klara Jumabaıqyzy, Mańǵystaý oblysy ákiminiń orynbasary Rýslan Sákeev baıqaý jeńimpazdaryn Qazaqstan Respýblıkasy Bilim jáne ǵylym mınıstrligi «Daryn» respýblıkalyq ǵylymı-praktıkalyq ortalyǵynyń dıplomdarymen, arnaıy syılyqtarymen marapattady.
Tórt baǵyt boıynsha jekelegen júldegerlermen birge, jeńimpaz toptar da anyqtaldy. Aldyńǵy oryndy Mańǵystaý oblysy, ekinshi oryndy Abaı atyndaǵy respýblıkalyq mamandandyrylǵan daryndy balalarǵa arnalǵan mektep-ınternaty, úshinshi oryndy Aqtaý qalasyndaǵy Nazarbaev zııatkerlik mektebi oqýshylary ıelendi.
Marapattan soń baıqaý qatysýshylary, jetekshileri jáne qazylar alqasy qara sózdiń suńǵyla súleıi, ádebıet áleminiń abyzy, mańǵaz Mańǵystaýdyń marǵasqasy, zamanymyzdyń zańǵar jazýshysy Ábish Kekilbaevtyń týǵan jeri Ondy aýylyna, Otpan taý tarıhı-mádenı keshenine saıahattady.
Mańǵystaý oblysy
