QOSh KELDIŃ, MÚBÁRÁK MÁÝLIT!

Ádettegideı bıyl da álemniń musylman memleketteri sııaqty elimizdiń meshitterinen bastalyp, úlkendi-kishili qala, aýdan, oblys orta­lyqtarynda súıikti paıǵambarymyz Muhammedtiń (s.ǵ.s) týǵan aıy Máýlit atalyp ótilip, merekelený ústinde. Senbi kúni Almatydaǵy Bas saraıǵa jınalǵan jamaǵat Alla taǵalany ulyqtap, Máýlitke qatysty ýaǵyzdarǵa, Paıǵambarymyzǵa (s.ǵ.s) aıtylǵan salaýattarǵa sýsyndap qaıtty. Dál sol kúni Respýblıka saraıynda “ıne shanshar” orynnyń bolmaǵanyna alǵash ret kýá bolyp qaıttyq. Adamnyń lyq tolǵany sonsha, zaldyń qatararalyq bos jerleri, qaptaly tolyp, turýǵa oryn qalmaǵany óz aldyna, foıege ornatylǵan ekrannan tyń­daǵan halyqta da esep joq. Saraı qyz­met­kerleri 3 saǵat aıaǵynan tik turǵan 5 myńǵa jý­yq jamaǵatty kórip, bas ǵımarattyń buryn-sońdy mundaı “aýzy-murnynan” shyǵyp tolmaǵanyna tańdanys bildirip jatty. Aldymen Máýlit merekesine jınalǵan jamaǵatty quttyqtaǵan Qazaqstan dinı basqarmasynyń tóraǵasy, Bas múftı, sheıh Ábsattar qajy Derbisáli hazret Paıǵam­bar­lardyń sultany Muhammedtiń (s.ǵ.s) ǵıbratty ǵumyryn qamtyǵan aýqymdy da, tereń maǵynaly baıandama jasap, adamzatty ımandylyq jolyna bastaıtyn Islam dininiń qundylyqtaryna toqtala kele, ásirese, Paıǵambarymyzdyń (s.ǵ.s.) jaratylysy ádemi, minezi de jibekteı, ári sabyrly, qara­paıym, teńdesi joq eń kámil jan bolǵanyn te­birene sıpattady. – 2004 jyly Elbasynyń Saýd Ara­bııa­syna resmı sapary barysynda Mekkedegi Ál-Haramǵa – Alla taǵala úıine kirdik. Ol sáttegi sezim bir bólek edi. Odan Paıǵambarymyzdyń (s.ǵ.s.) Mádınadaǵy meshitine baryp, juma namazyn birge oqýdy násip etti. Sol kúni keshke Paıǵambarymyzdyń (s.ǵ.s.) osy ýaqytqa deıin saqtalǵan úıine kirýge ruqsat aldyq. Biraq, esiktiń shynjyrǵa baılanǵan kilti jeti kisiniń moınynda eken. Jeti kisi birikkende ǵana qulyp ashylmaq. Eger olar­dyń bireýi kelmese, esik ashylmaıdy. Biz­diń kózimizshe jeti kisi jınalyp, bir mez­gilde qulypqa kilt salǵanda, esik ashyldy. Kirdik. Bar bolǵany eki-aq bólme. Ishki bólmede Aısha anamyzben turypty. Al kire beriste Fatıma anamyz tursa kerek. Úı ishi sonshama qa­ra­pa­ıym. Sonda jambasyna batqan shıdi óz kó­zi­miz­ben kórdik. Mine, úlgi, mine, qara­pa­ıym­dy­lyq, – dedi dinbasy. Sondaı-aq, hazret Máýlit myń jyldan asa ýa­qyttan beri toılanyp kele jatqanyna, tipti, Sıngapýrde 10 paıyz ǵana musylman bol­sa da bir aı boıy, al Sırııada máýlet bas­talǵansha, máýlet bitken soń taǵy bir-bir aı qosyp, úsh aı boıy toı­laıtynyn, Qazaq­stan­da 26 ulttan t­u­ratyn musylmannyń bir­lik, yntymaqta tu­ryp jatqanyn asqan yqylaspen jetkizdi. So­nymen qatar, Sa­dýa­qas Ǵylmanı ata­myzdyń muraǵatynan qazaq tilinde jazyl­ǵan Máýlitin taýyp al­ǵanyn, biraq, ol úrdis úzilip qalǵanyn, aldaǵy ýaqytta sony jalǵastyryp, ana tilimizde de ótkizýdi bastaıtyn shyǵarmyz degen oıyn da bildire ketti. Adamzattyń ardaq tutar tulǵasy Paıǵambarymyz Muhammedtiń (s.ǵ.s.) búkil ómiri, qyzmeti óleń dastanǵa túsirilgen hasıdany, ıaǵnı Máýlittiń madaq jyrynan salaýat aıtqan qarılar – Jumanazar Sadyrhanov, Danııar Jumabaev, Ahmet Mu­hamed­janov, Eıdır Honan áýezdi daýys­tarymen maqamyna keltire jetkizdi. Artynan oqylǵan Quranǵa Bas múftı: “Osy oqylǵan qasıetti Qurannyń qasıetti aıattarynan bolǵan saýapty dúnıeden ótken barsha musylmandarǵa, Paıǵambarymyz Muhammed Mustafa (s.ǵ.s.) rýhyna, keshegi tabıǵat apatynan qaza tapqan baýyrlarymyzdyń rýhyna baǵyshtadyq. Elimizge amandyq, jerimizge, halqymyzǵa tynyshtyq, bereke-birlik bersin, áýmın!”, – dep bata jasady. Alla taǵalanyń súıikti elshisine (s.ǵ.s) izgi nıetin bildirip, quttyqtaýǵa Almaty qalasy, Medeý aýdanynyń ákimi Mahambet Baıdaly da keldi. Belgili ǵalymdar M.Áýezov atyndaǵy Ádebıet jáne óner ınstıtýtynyń bólim meńgerýshisi  Aıgúl Smakova, professor Islam Jemeneı “Paıǵambarymyz (s.ǵ.s.) – adamzattyń uly ustazy”, “Paıǵambary­myz­dyń (s.ǵ.s.) zamanaýı ómirlik úılesimdiligi” degen taqyrypta jan-jaqty da, mazmundy baıan­dama jasady. QMDB-nyń apparat jetekshisi Qaırat Joldybaıuly da Paı­ǵam­ba­rymyzǵa (s.ǵ.s.) súıispenshilik jaıly baıan ete kele, dinı basqarma qasıetti kúnge Paı­ǵam­barymyzdyń (s.ǵ.s.) ómiri, qyzmeti jaıly eki tilde 5 myńǵa jýyq kitaptyń tara­tyl­ǵa­nynan habardar etti. Qoǵam jáne memleket qaı­ratkeri Murat Áýezov Qazaqstannyń eń úlken saraıynyń biri lyq tolyp, qanshama jurttyń túregelep turǵanyna tolǵanyp otyrǵanyn, Paıǵambarymyz (s.ǵ.s.) dúnıege kelgen kúnnen bastap jalpy adamzattyń tarıhy múlde basqa sapa, múldem basqa ól­shemge ıe bolǵanyn, bul – máńgilik, eshqashan ósh­peıtin nur, óshpeıtin rýh ekenin, eger damyǵan órkenıetti táýelsiz memleket bol­ǵymyz kelse, osy jolda ıslam dini, má­denıeti, órkenıeti eń úlken tireý, qoldaıtyn da, basqaratyn da kúsh ekenin tebirenispen jetkizdi. Allaǵa shúkir, qazaq halqynyń talantty urpaqtary kóp. Máýlit toıyna ónerpazdar da qyzmet jasady. Bıylǵy jyldyń ereksheligi – M.Áýezov atyndaǵy teatrdyń bas rejısseri Á.Rahımov Omar (r.a.) halıfanyń zama­nyn­daǵy taqýalyqty baıan etetin teatrlan­dy­ryl­ǵan qysqasha qoıylym qoısa, Eskendir Ha­san­ǵalıev, Shámil Ábiltaev, Toqtar Serikov, sondaı-aq ózderi de, ánderi de ásem “Seriler”, “Meloman”, “Jigitter” toby, 6 jasar kishkene Qazbek Dúısenbaevtar júregińdi shymyrlatar dinı ánder oryndady. Keshti ádemi júrgizýge eńbek sińirgen Tuńǵyshbaı ál-Tarazı aǵamyzǵa Allanyń rahmeti jaýsyn demekpiz. Jyl saıyn Máýlit merekesi qarsańynda dinı basqarma “Kókjıek” baspasymen birigip, Paıǵambarymyzdyń (s.ǵ.s.) ónegeli ómir joly týraly jazylǵan shyǵarmalarǵa stýdentter men mektep oqýshylary arasynda baıqaý jarııalaıdy. Oǵan bıyl elimizdiń túkpir-túkpirinen 3 myńǵa jýyq talapker qatysqan. Máýlitte baıqaý jeńimpazdary men ynta­landyrý syılyǵyna ıe bolǵandardy Bas múftıdiń ózi marapattady. Úlken shyǵar­ma­shylyq izdenispen uıymdastyrylǵan sal­tanatty kesh Jeken Omarovtyń “Zikirolla” ánimen támamdaldy. Gúlzeınep SÁDIRQYZY.