Jalpy, «Amanat» platformasy óz jumysynda bes baǵytty tańdaǵan – daıarlyq, adaldyq, kásibılik, dıalog jáne senim. Osy baǵyttardyń árqaısysy boıynsha platforma belsendileri kúni-túni tynbaı jumys istegen.
Brıfıng barysynda sóz alǵan platforma ákimshisi Lıma Dıas saılaý barysyndaǵy anyqtalǵan buzýshylyqtarǵa da toqtalyp ótti.
– Saılaý barysynda buzýshylyqtarǵa qatysty 165 aýyzsha eskertý jasaldy, onyń bári der kezinde joıyldy. Qosymsha 18 eskertý sol arada túzelgen joq nemese bul kemshilikter eleýli sanalyp, olar boıynsha aktiler toltyrylǵan. Sol 18 aktiniń ishinde 8-i saılaý jáshigine toptap bıýlletender salýǵa qatysty boldy, – dedi L. Dıas. Bul rette ol saılaýdyń Qazaqstan úshin erekshe bolǵanyn atap ótti.
Platforma ákimshisi Prezıdent saılaýynda jastardyń óte belsendi bolǵanyn da sóz etti. Ásirese óz yqtııarymen baıqaýshy bolýǵa ynta bildirgender sany kóp bolǵan.
Uıym ókilderi óz jumystarynyń basty jetistigi retinde elimiz boıynsha eń kóp táýelsiz baıqaýshy daıarlanǵanyn atap ótti. Máselen, «Amanattyń» 11 myńǵa tarta baıqaýshysy elimizdegi saılaý ýchaskelerin tolyq qamtyǵan.
«Amanat» platformasynyń ókilderi saılaýdan túıgen oılaryn qoryta kele, birneshe mańyzdy máseleni iriktep alǵan. Atap aıtqanda, qazaqstandyq saılaýshylardyń elimizdiń zańnamalarynan habarsyzdyǵy, táýelsiz baıqaýshylardyń saılaý zańdylyqtaryn talap ete otyryp, ózderi saqtamaıtyndyǵy anyqtalǵan. Osydan kelip qoǵamǵa qur aıqaıshy emes, zańdy biletin adamdardyń qajettigi týraly pikir qalyptasqan.
Platforma ókilderi sondaı-aq baıqaýshylarǵa saıası mádenıettilik artyqtyq etpeıtinine kóz jetkizgen.
