Jeli ótkir, kún shýaǵy mol Mańǵystaýda atalǵan tabıǵat qubylystaryn paıdalanyp, stansa ornatamyn dese, múmkindik zor. Sol sebepti Mańǵystaý oblysynda jańartylmaly energııa kózderin damytý baǵytynda birneshe jobalar iske asyrylýda. 2018 jyldyń mamyr aıynan bastap Munaıly aýdany Batyr aýylynda qýaty 2 MVt kún elektr stansasy paıdalanýǵa berilse, endi Túpqaraǵan aýdany Aqshuqyr aýylynda quny 800 mln teńgeni quraıtyn jel elektr stansasy iske qosyldy.
«BEST-Group NS» JShS kompanııasy atalǵan stansa qurylysyn 2017 jyldyń kúz aıynda bastaǵan. Montaj-qurylys jumystaryn otandyq mamandar jasap, zaýyttyń týrbınalary halyqaralyq sapa standarttaryna sáıkes sertıfıkattalǵan. Qýaty 5 MVt-ty quraıtyn keshenniń qurylysy barysynda 11 jumys orny ashyldy, aldaǵy ýaqytta jumys orny 20-ǵa deıin jetpek.
– Mańǵystaý oblysynyń ákimdigi bizge Túpqaraǵan aýdanynan jer telimin berdi. «Damý» qorynyń kepildigimen biz sýbsıdııalanatyn mólsherlememen bankten nesıe aldyq. Jobany sheteldik kompanııalar ınvestısııalaýda. Atap aıtqanda, osy jobanyń seriktesteri men ınvestorlary amerıkalyq jáne reseılik kompanııalar – Lone Star Renewable Energy Corp (AQSh) jáne «Energotehservıs» JShQ (Reseı). Jalpy jobany iske asyrýdaǵy basty maqsatymyz – jel elektr stansalaryn paıdalaný arqyly negizgi energııa kózderin aýystyrý, Qazaqstandaǵy parnıktik gaz qaldyqtaryn azaıtý, sol arqyly klımattyń ózgerýi týraly BUU-nyń negizdemelik konvensııasyna sáıkes jumys isteý. Endi bir aıdan soń biz óz ónimderimizdi sata bastaımyz. О́nimdi satyp alýshylar «Esepteý jáne qarjy ortalyǵy» JShS bolmaq. Germanııa elinde jasalǵan qondyrǵylar arqyly stansııa, jel qýatyn paıdalaný nátıjesinde elektr energııasyn óndirip, oǵan qajettilikti tolyq óteıtin bolady. Aqshuqyr aýylynyń turǵyndaryna, sondaı-aq aýyl mańyndaǵy óndiris oshaqtary men jylyjaılarǵa elektr qýaty tapshylyǵyn joıady, – deıdi jobanyń damý jónindegi dırektory Gúlnar Ábıtova.
Jańa nysannan basqa Túpqaraǵan aýdany Fort-Shevchenko qalasynda eki birdeı joba iske aspaq. Qazirgi tańda maýsym aıynda paıdalanýǵa beriletin 42 MVt kún elektr stansasy men jyl sońynda iske qosylatyn 43 MVt jel elektr stansasynyń qurylys-montajdaý jumystary júrgizilýde.
– Sondaı-aq qazirgi tańda Energetıka mınıstrligimen úsh jobany júzege asyrý boıynsha jumys jasaqtalyp jatyr. Beıneý, Jetibaı jáne Shetpe aýyldarynda qýaty 10-15 MVt-ty qamtıtyn jel jáne kún elektr stansasynyń keshendi jumystarynyń jospary daıyndalýda, – deıdi Mańǵystaý oblysynyń energetıka jáne turǵyn-úı kommýnaldyq sharýashylyq basqarmasynyń basshysy Jandos Salımov.
Bul baǵytta aýqymdy mindetti eńserý jolyndaǵy jumystar jalǵasa bermek.
Mańǵystaý oblysy
